801
Үнгэрһэн долоон хоногто Сагаан һарын һайндэртэ зорюулагдаһан бүхэ барилдаагаар мүрысөөн 400 гаран хүнүүдые суглуулаа. Февралиин 24-дэ түрэһэн үдэрөө тэмдэглэжэ байһан мэдээжэ барилдаашан Цыбик Максаров ээлжээтэ амжалтаяа туйлаба.
Сагаан һарада зорюулагдаһан мүрысөөндэ заншалта ёһоороо ехэшүүл гурбан шэгнүүртэ барилдаа, үхибүүд түрүү һуури эзэлхын түлөө найман шэгнүүртэ тэмсэһэн байна.
Андрей Федореев (Усть-Ордын дасан), Алексей Надмитов (Атаган дасан), Булат Бадмажапов (Табангууд-Үшөөтын дасан), Бато-Доржо Цыренов (Гэгээтэйн дасан), Чимит Жамсаранов (Анаа дасан), Жаргал Баяндуев (Баргажанай дасан), Тамир Цыдемпилов (Санагын дасан) болон Тумэн Бодиев (Хурамхаанай дасан) гэгшэд өөр өөрын шэгнүүртэ түрүүшын һууринуудые эзэлһэн байна.
Байгша онһоо 2007 оной хүбүүд барилдаанда хабаададаг болонхой. Тус мүрысөөндэ аяар 69 хүн суглараа. Түрүү һуури эзэлхын түлөө тулалдаанда Бургалтайн дасанай түлөөлэгшэ Владимир Банзаракцаев «Балдан Брейбун» дасанай Дмитрий Гармаевтай уулзаа.
- Уулзалгын үедэ намда добтолходонь, нэгэ бага һууд гээд, дээгүүрээ шэдэжэрхёоб, - гэжэ баяртай илагша Владимир Банзаракцаев хөөрэнэ.
Владимир хадаа Доодо-Ивалгын һургуулида 5-дахи класста һурадаг байна. Тэрэ Улаан-Үдын Сокол һуурин автобусоор ерэжэ, Сергей Сакияевай ударидалга доро һорилго хэнэ.
2007 оной үхибүүдэй дунда гурбадахи һуурида Хурамхаанай дасанай Агван Булгатов эзэлээ.
Ехэшүүлэй дунда 63 килограмм хүрэтэр шэгнүүртэ чемпионой нэрэ зэргэдэ Баргажанай дасанай жиндаг Константин Цыренов хүртөө. Тэрэ нютагай хүбүүн Алексей Раднаев 75 килограмм хүрэтэр шэгнүүртэ түрүүлжэ гараа. Эгээл томо шэгнүүртэй барилдаашадай дунда болоһон финалда Цыбик Максаров Захааминай Ринчин Санжиевай нюрга шоройдуулжа, чемпион боложо тодороо.
Бүхэ барилдаагаар удаадахи мүрысөөн мартын 7-до болохоор хараалагдана. Энэ үдэр Улаан-Үдэ хотын чемпионат үнгэргэгдэхэ юм. Гоман дасанай хамба ламанар байһан Галсан-Лэгдэн Аржигаров болон Агван-Нима Цыдыпдоржиев гэгшэдэй мүнхэ дурасхаалда энэ мүрысөөн зорюулагдаха.
Авторай гэрэл зураг
Автор: Борис БАЛДАНОВ
