​​Эрдэмтэнэй нэрэ бусаагдаба

Буряад арадай түрүүшын эрдэмтэн Доржи Банзаровай нэрэ Буряадай гүрэнэй ехэ һургуулида бусаагдаба.

Февралиин 27-до Буряад Уласай Толгойлогшо Алек­сей Цыденов, Арадай Хура­лай Түрүүлэгшын орлог­шо Цырен-Даша Доржиев, Улаан-Үдэ хотын захиргаа­най хүтэлбэрилэгшын уял­га дүүргэгшэ Игорь Шутен­ков, Буряадай гүрэнэй ехэ һургуулиин ректор Николай Мошкин гэгшэд Доржи Бан­заровта хүндөө мэдүүлэн, хүшөөгэйнь дэргэдэ баглаа сэсэгүүдые табиба.

Буряад арадай түрүүшын эрдэмтэн Доржи Банзаровай нэрэ Буряадай гүрэнэй ехэ һургуулида бусаагдаба гэһэн мэдээсэлэй 2018 оной эсэс тээхэнэ дуулдахада, буряад-монгол үндэһэтэн, Эхэ орон­доо ехэ дуратай хүнүүд ямар ехээр баярлаа гээшэб! Буря­ад арадай ирагуу найрагша, Уран зохёолшодой холбооной түрүүлэгшэ Матвей Рабдано­вич Чойбонов онсо оролдон, эсэлтэ сусалтагүй энэ хэрэгэй түлөө ябаһыень тэмдэглэхэ хэрэгтэй.

Доржи Банзаровай нэ­рэмжэтэ Буряадай гүрэнэй ехэ һургуулиин багшанар ба оюутадта аза жаргал, эрдэм шэнжэлгын хэрэгтэнь амжал­та хүсэебди. Энэ һургуулида наһаараа ажаллаһан Галсан Батоев иигэжэ хэлэбэ: “Үнэн юумэн үнөөрөө илаба!”

Анна Огороднигой гэрэл зураг