​​Юрэнхылэгшын шиидхэбэринүүд дэмжэгдэнэ

kremlin.ru cайтһаа гэрэл зураг абтаба

Буряад Уласай Толгойлогшо Алексей Цыденов болон Буряад Уласай Засагай газарай сайдууд, һургуулинуудай захиралнууд, аймагай түбүүдэй ахамад эмшэд, Сбербанкын ажалшад, аймагуудай засаг дарганар болон бусад хүтэлбэрилэгшэд Буряадай гүрэнэй ехэ һургуулиин хатарай танхим соо Улаан-Үдын залуушуултай февралиин 27-до уулзаа.

Энэ уулзалгые олондо мэдээсэл тараадаг сурбалжалагшад эмхидхэн ябуулаа. Эндэ Росси гүрэнэй Юрэнхылэгшэ Владимир Путинай 2019 оной февралиин 20-до олониитэтэй түбэй телевиденеэр эмхидхэһэн хөөрэлдөөгөөр залуушуулай табиһан олон һонин асуудалнуудта Засагай газарай түлөөлэгшэд, дарганар, хүтэлбэрилэгшэд болон сайдууд харюунуудые үгэбэ.

Энэ уулзалгын ехэнхи асуудалнууд социальна тала баримталаа. Жэшээнь, ажаллаха хүсэн (кадры) мүнөө дээрээ һанаа зобоомо асуудал болоод байна. Тиимэһээ залуушуул 2020 онһоо бэелүүлэгдэжэ эхилхэ “Земскэ багша” гэһэн программар һонирхоо. Мүнөө багшанар хүдөө нютагташье, мүн ондоо хото тосхонуудаар дуталдадаг болонхой. Тэрэ нютагууд руу хүдэлхэеэ ошобол, сая түхэриг гүрэнэй тэдхэмжэдэ хүртэхэ гээшэ. Энэ ехэ һайшаалтай.

Энэ асуудалаар Буряад Уласай болбосоролой болон эрдэм ухаанай сайд Баир Жалсанов өөрынгөө һанамжа хэлэбэ: “Владимир Путинай соносхоһон “Земскэ багша” гэһэн программые бидэ ехэ дэмжэнэбди. Юуб гэхэдэ, Буряад Уласай 467 һургуулинуудай 80 хубинь хүдөөгэй һургуулинууд ха юм. Мүнөө дээрээ хүдөөгэй һургуулинуудта 560 багшанар дуталдана. Тиимэһээ бидэ ехэ дуратайгаар энэ программые хүлеэн абажа, түргэн болзорто хүсэндөө ороһой гэжэ һананабди. Энэ программын ёһоор, хүдөөгэй һургуулинууд залуу мэргэжэлтэдээр олошорхын хажуугаар, мүн дүй дүршэлтэй багшанар ошожо хүдэлхэ аргатай болохо. Мүнөө хүдөөгэй һургуулинуудай 20 хуби багшанар наһанай амаралтада гараһан ба гарахаяа байһан багшанар хүдэлнэ бшуу”.

Эндэ Дээдэ-Ивалгын һургуулиин захирал Татьяна Дансарунова нэмэжэ хэлэхэдээ, иигэжэ тэмдэглэбэ: “Тон хэрэгтэй шиидхэбэри гэжэ бодоноб. Тус программын ашаар залуу мэргэжэлтэдые дэмжэжэ ба дүй дүршэлтэй болоһон багшанараа хүдөөдэ үлээжэ шадаха болонобди. Мүнөө манай һургуулида олонхи багшанарнай 45-һаа дээшэ наһанай гээд тоолохоор. Эдэ багшанараа бидэ алдаха дурагүйбди. Хэрбэеэ саашанхи ерээдүйгөө хараалжа, залуу мэргэжэлтэдые ерүүлжэ хүдэлгэбэл, нэгэ бэрхэшээлтэ асуудалтай тохёолдообди. Энэмнай юун бэ гэбэл, залуу багшанарай мүнгэнэй салин бага тула, нэмэлтэ мүнгэн һургуулиин жасаһаа түлэгдэхэ болоно. Тиимэһээ бидэ манай һургуулида залуу мэргэжэлтэд ерэжэ хүдэлһэй гэжэ балайшье дуратай бэшэбди. Юундэб гэхэдэ, манай һургуулида дүй дүршэлтэй болоһон багшанарай тоо 85,7 хуби хүрэнэ. Тиимэһээ манай һургуулида энэ асуудалаар бэрхэшээл үгы. Харин холын хүдөө нютагуудта залуу багшанар хэрэгтэй”.

Гадна үнинэй хүсэндөө ороһон “Земскэ доктор” гэһэн программа шэнэлэгдээ. Тиигэжэ ганса залуушуул - һаяхана дээдэ һургуулияа дүүргэгшэд бэшэ, харин 50 наһаяа алхаһан эмшэд хүдөө нютаг ошожо хүдэлхэ аргатай болоо бшуу. Эмшэдтэ - сая түхэриг, фельдшернүүдтэ - 500 мянган түхэриг мүнгэн гүрэнһөө үгтэхэ юм.

Багшанар ба эмшэдэй хүдөө нютаг ошожо хүдэлхын тула, “Соёл” гэһэн түсэл бэелүүлэгдэжэ, аяар 17 миллиард түхэриг мүнгэн хүдөөгэй соёлой байшануудай барилгануудта, мүн шэнээр заһабарилгада гаргашалагдаха, тиихэдэ 6 миллиард түхэриг мүнгэн Ород гүрэнэй бага хотонуудай соёлой түбүүдэй хүгжэлтэдэ үгтэхэ байна.

Хүн зоной тоо бүридэл болон хубилалтанууд, тэрэ тоодо залуу айл бүлэнүүдые, залуу мэргэжэлтэдые, үхибүүнэй түрэхэдэ тэдхэмжэ мүнгэнэй, эрэмдэг бэетэй үхибүүдтэ дүнгэлтэ гэһэн асуудалнууд хараалагдаа. Жэшээнь, эрэмдэг бэетэй үхибүүдтэ анхан 5,5 мянган түхэриг мүнгэн түлэгдэдэг һаа, харин байгша оной июлиин 1-һээ 10 мянган түхэриг мүнгэн түлэгдэдэг болохонь.

Гадна пенсиин индексаци, хүнгэлэлтэтэй ипотекын асуудалнууд зүбшэгдөө. 2019 оной январиин 1-һээ гурба болон гурбаһаа дээшэ үхибүүдтэй гэр бүлэнүүдтэ туһаламжа болоно, ипотекын түлбэриинь 450 мянган түхэриг федеральна бюджедһээ түлэгдэхэ болоо. Үшөөшье олон асуудалнууд тобойн бодхоогдоо.

Иимэ уулзалганууд заншалта болохоор хараалагдана.