«Буряад үнэн» Хэблэлэй байшанай захирал Баир Ширапов хүршэ Монгол орондо ашагтай хэдэн хэлсээ хэжэ ерэбэ.
Мартын 7-до “МОНЦАМЭ” агентствын орлогшо дарга Ш. Батболдтой уулзажа, хамтаран ажаллаха түсэбүүдээ элирхэйлээ. Гадна Россиин «Коммерсантъ» гэжэ Хэблэлэй байшантай сасуулмаар "Өдрийн сонин" гэжэ томо компаниин гүйсэдхэхы захирал Ж. Сандагдоржтой, Монгол Уласай Сэтгүүлшэдэй холбооной түрүүлэгшын орлогшо Ж. Батбаатартай, Монгол Уласай болбосоролой ехэ һургуулиин журналистикын тэнхимые даагша дид-профессор М.Одмандахтай уулзаа.
“МОНЦАМЭ” агентствын мэдээсэлнүүдые “Буряад үнэн” Хэблэлэй байшан тунхаглажа байха. Тиигэхэдээ Монголой буряадуудай ажамидарал, үндэһэн соёл тухай олондо дуулгажа байдаг Дорнод, Хэнтэй, Сэлэнгэ, Булган, Хүбсэгэл аймагуудай таһагай сурбалжалагшадтай холбоотойгоор ажал ябуулагдаха.
“МОНЦАМЭ” агентствын "Новости Монголии" гэжэ сониной харюусалгата редактор Ю. Дэлгэрмаатай Баир Кимович уулзажа, саашадаа хамтаран ажаллаха арга боломжонуудаа тодорхойлоо.