Гурбадахи жэлээ удаа дараалан Буряадай сумо барилдаашад һайн дүнгүүдые харуулжа байна. Энэшье удаа тэдэ Ородой чемпионадта шалгараа. Бүхы дээрээ 11 медаль абажа шадаа.
Мүнөө жэлэй мүрысөөн Смоленск хотодо үнгэргэгдэжэ, 300 гаран тамиршадые суглуулаа. Хэмжээ ябуулгын түрүүшын үдэр 22 наһа хүрөөдүй тамиршад дохё (сумо барилдаанай хибэс) дээрэ гараа. Хоёрдохи үдэрынь 24 наһа хүрөөдүй тамиршадай мүрысөөн болоо. Һүүлшын гурбадахи үдэртэ ехэшүүл барилдаа.
22 наһа хүрөөдүй тамиршадай дунда Буряадай түлөөлэгшэд хоёр медаль абаа. Аюр Дондуков чемпионой нэрэ зэргэдэ хүртөө. Мүн Тимур Мункуев мүнгэн медаль абажа шадаа. Командна тулалдаануудта Тимур Мункуев, Аюр Дондуков, Аюр Хандаков болон Цэдаши Дугаров хоёрдохи һуури эзэлһэн байна.
Түрүүшын үдэр шалгарһан Аюр Дондуков болон Тимур Мункуев гэгшэд 24 наһа хүрөөдүй тамиршадтай барилдахадаа, гурбадахи һууринуудта гараа. Сангади Ульзетуев болон Александр Банзаракцаев гэгшэд мүнгэд медальнуудаар шагнагдаа.
Эрэшүүлэй дунда мүрысөөндэ үнөөхил Аюр Дондуков ба Тимур Мункуев гэгшэд хэды эсэбэшье, хүрэл медальнуудые абажа шадаһан байна. Буряадай мэдээжэ барилдаашан Балдан Цыжипов сумо барилдаанай мүрысөөндэ анха түрүүшынхиеэ оролсожо, шангай гурбадахи һуури эзэлээ. 115 килограмм хүрэтэр шэгнүүртэ, мүн абсолютна тулалдаануудта тэрэ хоёр дахин гурбадахи һуурида гараа.
Смоленскдэ болоһон тулалдаануудай удаа Ородой суглуулагдамал команда бүридхэгдөө. Буряадаймнай гурбан тамиршад Европын чемпионадта ошохо эрхэдэ хүртөө. Тэрэ мүрысөөн апрелиин 18-21-эй үдэрнүүдтэ болохоор хараалагдана.
Сумогой федерациин зураг