Байгша оной мартын 27-до Ц.С. Сампиловай нэрэмжэтэ уран һайханай музейдэ Монгол уласай уран зурааша Жанатхан Ойланай «Хүхэ мүнхэ тэнгэриин орон» гэһэн үзэсхэлэнэй нээлгын баяр ёһолол үнгэргэгдэбэ. Энэ хэмжээ ябуулгада Буряад уласай соёлой сайд Соёлма Дагаева, Улаан-Үдэдэ Монголой элшэн сайд Чаадраабал, Ородой Холбоото Уласта Монголой соёлой түлөөлэгшэ Хурэлбаатар Дамдинсурэн гэгшэд хабаадаа.
Буряад уласай соёлой сайд Соёлма Дагаева Улаан-Үдэдэ энэ үзэсхэлэнэй нээгдэһэндэ баяраа мэдүүлжэ, алда хүхэ хадагаар Монголой айлшадые золгобо.
- Иимэ һонин хараа бодолтой хүн Ородой Холбоото Улас дотор үзэсхэлэн дэлгэжэ байһандань ехэ баяртайб. Эдэ зурагуудта дэлхэйн соёл уралиг харахаар, - гэжэ соёлой сайд баярай үгэнүүдые хэлэбэ.
Тиихэдэ Буряад Уласай соёлой яаманай хүндэлэлэй грамота Хурэлбаатар Дамдинсурэндэ Соёлма Дагаева барюулаа. Соёлма Дагаевагай хэлэһээр, богони сагай хугасаада энэ хүн хоёр гүрэниие нэгэдүүлхэ талаар горитой ажал хэһэн байна. Уран бэлигэй түлөө баярай бэшэг Монголой зураашан Жанатхан Ойланда соёлой сайд барюулаа.
Энэ үдэр Ц.С. Сампиловай нэрэмжэтэ уран һайханай музейдэ сугларагшадые Улаан-Үдэдэ Монголой элшэн сайд Чаадраабал болон Дамдинсурэн амаршалаа. Айлшад музейн байгуулагдаһан 75 жэлэй ойн баяраар амаршалжа, Жанатхан Ойланай хоёр зураг бэлэглээ.
«Хүхэ мүнхэ тэнгэриин орон» гэһэн үзэсхэлэн юрэ иигэжэ нэрлэгдээ бэшэ, эндэ дэлгэгдэһэн зурагууд уран зураашын байгуулһан тайлбарилагдаагүй юртэмсэ болоно. Зураг бүхэн өөрын гүн ухаанай удхатай, зураг бүхэн өөрын тайлбарилгатай. Жанатхан Ойланай зурагуудта хара хүхэ үнгэһөө сэнхир хүхэ үнгэнүүд хэрэглэгдэнхэй. Табан жэлэй туршада гушанһаа дээшэ зурагдаһан зурагууд үзэсхэлэндэ дэлгээтэй. «Хүхэ мүнхэ тэнгэриин орон» гэһэн үзэсхэлэн Улаан-Үдэдэ апрелиин 12 болотор дэлгэгдэхэ, удаань Эрхүү хотодо ажалаа үргэлжэлүүлхэ. Жанатхан Ойлоной зурагууд Турци, Франци, Германи, Казахстан, Америкэ, Венгри, Испани болон Ирланди гүрэнүүдтэй дэлгэгдэһэн гээд тэмдэглэлтэй.
Анна Огороднигой гэрэл зурагууд