853
Алас Дурнын федеральна тойрогой тэдхэмжын ашаар Ярууна аймагай Гүүндэ нютагтасоёлой шэнэ байшанай барилга дүүргэгдэхэ. Тэрэнэй барилгада 2,8 сая түхэриг һомологдохо юм.
Соёлой шэнэ байшанай барилга 2017 ондо түсэблэгдэжэ, түсэблэлгын-гаргаша тоололгын дансанууд бэлдэгдэһэн байна. 2018 ондо барилгын түрүүшын шата хэгдээ. Энэ ажалда уласай бюджетһээ 2,7 сая түхэриг һомологдоо һэн. Байгша ондо Алас Дурнын федеральна тойрогой тэдхэмжын ашаар барилга дүүргэхэ түсэбтэй. Зайн галаар, дулаагаар хангаха, сонхо, шала табиха, шэрдэлгы будалгын ажал хэгдэхэ юм. Мүнөө Гүүндэ нютагта соёлой хэмжээ ябуулганууд үшөө 1958 ондо баригдаһан байшанда үнгэргэгдэнэ. Энэ байшан олон зоной хабаадалгатай хэмжээ ябуулгануудые үнгэргэхэ эрилтэнүүдтэ тааруу бэшэ гэжэ ойлгосотой.
Баян түүхэтэй Гүүндэ нютагта мянганһаа дээшэ хүн ажаһуудаг. 2019 ондо нютагай зоной баярта 252 дүрбэлжэн метр талмайтай со1лой шэнэ байшан нээгдэхэ. Тайзантай, харагшадай танхимтай соёлой байшанда номой сан ажалаа ябуулха юм.
Мүнөө эндэ хүүгэдэй болон аха зоной 8 кружок ажалаа эрхилнэ. 2018 ондо соёлой ажалшад 140 хэмжээ ябуулгануудые эмхидхэһэн байна. «Родные напевы» гэһэн томошуулай дуунай бүлгэм эдэбхитэй хабаадагшадай нэгэн. Тэдэнэр 2018 ондо Буряад Уласай байгуулагдаһаар 95 жэлэй ойдо зорюулагдаһан «Песня о родном крае» гэһэн интернет-мүрысөөндэ I шатын дипломоор шагнагдаһан байна гээд тэмдэглэлтэй.
Тиихэдэ Алас Дурнын федеральна тойрогой тэдхэмжын ашаар Ярууна аймагай Ширинга нютагта 2019 ондо соёлой байшан баригдаха.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Бүхыдөө Буряад уласай соёлой һалбарида 10 объект заһаабрилга болон барилга хэгдэхэ юм.
