1209
Франциин Париж хотодо дайшалхы тамирай зүйлнүүдэй Уласхоорондын 34-дэхи фестиваль үнгэрөө. Энэ хэмжээ ябуулгада Буряадай тамиршад хабаадалсаа.
Мэдээжэ Аккар Хотелс Аренада үнгэргэгдэһэн хэмжээ ябуулгада Ородой Холбоото Уласай Татарстан, Буряад уласууд, Новосибирскэ можо, Москва, Санкт-Петербург болон бусад можо нютагуудай зуунһаа дээшэ тамиршад хабаадаа. Ород гүрэнэй эгээл олон тамиршадтай делегацинуудай нэгэн байгаа. Фестиваль харахаяа10 мянганһаа дээшэ хүнүүд сугларһан байна.
Ородой Холбоото Уласай делегацида дэлхэйн, Европын, Ород гүрэнэй чемпион, Ород гүрэнэй спортын габьяата мастер Баир Омоктуев, дэлхэйн, Европын, Ород гүрэнэй чемпион, Ород гүрэнэй спортын мастер Владимир Дамдинов болон «Эрын гурбан нааданда» нэгэнтэ бэшэ илалта туйлаһан, Нүүдэлшэдэй дэлхэйн наадануудай илагша Олег Цыбикжапов гэгшэд Буряад уласай түлөөлөө. Олон тоото сугларагшадые тэдэнэр бүхэ барилдаан болон һур харбаантай танилсуулаа.
- Олон тоото харагшад болон хабаадагшадые угсаата арадайнгаа тамирай зүйлнүүдтэй бидэнэй үнгэргэһэн танилсуулга олондо һайхашаагдаа. Ондоо гүрэнүүдэй тамирай зүйлнүүдые бултыень шахуу хаража, фестивалиин һүүл багта тайзан дээрэ гараабди. Тиихэдэ бүхэ барилдаан, һур харбаанда адли тамирай зүйлнүүдые хараагүйб. Манай хубсаһан, амаршалгын хатар харагшадые һонирхуулаа. Бидэнэй танилсалга үнгэргэһэнэй удаа олон хүн бидэниие амаршалаа, һаналаараа хубаалдаа, - гэжэ Баир Омоктуев хэлэбэ.
Буряад Уласай соёлой яаманай мэдээсэлэй албанһаа гэрэл зураг абтаба
.
