999
Федеральна болон уласай бюджетһээ һомологдоһон мүнгөөр Буряад Уласта болбосоролой эмхинүүд һэльбэн шэнэлэгдэнэ. 2019 ондо Буряадай болбосоролой дунда мэргэжэлэй 17 эмхидэ зөөриин-оньһон хэрэгсэлнүүд шэнэлэгдэхэ. Болбосоролой эмхинүүдэй ехэ заһабарилгада, тоног хэрэгсэлнүүдые худалдан абалга, «WorldSkills» гэһэн хэмжээнэй эрилтэнүүдтэ тааруу һуралсалай-үйлэдбэриин бааза шэнэдхэлгэдэ Алас Дурнын федеральна тойрогой 311,8 сая түхэригэй тэдхэмжэ шэглүүлэгдэхэ.
М.Н. Ербановай нэрэмжэтэ Буряадай аграрна колледждэ хүдөө нютагуудта хүдэлхэ малай эмшэдые бэлдэхэ. Хяагта хотын барилгын болон үйлэдбэриин технологинуудай һуралсалай эмхидэ «WorldSkills» гэһэн хэмжээнэй эрилтэнүүдтэ тааруулан, зөөриин-оньһон хэрэгсэлнүүд шэнэлэгдэхэ. Тиихэдэ оюутадай бэлэдхэл гаража, штукатурна ажалай танхимай һэльбэн шэнэдхэлгэдэ 4,7 сая түхэриг һомологдохо.
«Сварочные технологии» гэһэн шэглэлэй түб байгуулгада Селенгинск һууринай политехническэ техникумдэ 9,8 саяһаа дээшэ мүнгэн гаргашалагдаха.
- Ажалаар хангагшадай эрилтэнүүдтэ таараһан мэргэжэлтэдые бэлдэхэ, болбосоролой эмхиин һуралсалай бааза шэнэдхэхэ, залуу мэргэжэлтэдэй ажалтай болохо талаар энэ ажал ехэ туһатай, - гэжэ техникумэй захирал Олег Якимов хэлэбэ.
Буряад Уласай Загарай, Захаамин, Зэдэ, Түнхэн, Сэлэнгэ, Кабанск, Хяагта аймагуудай болон Северобайкальск, Улаан-Үдэ хотонуудай дунда мэргэжэлэй эмхинүүдэй зөөриин-оньһон хэрэгсэлнүүд шэнэлэгдэхэ юм.
Буряад Уласта ниигэмэй һалбари хүгжөөлгэдэ федеральна болон уласай программанууд бэелүүлэгдэнэ. Уласаймнай болбосоролой 5 эмхи 2018 ондо мүнөө үеын хэрэгсэлнүүдээр хангагдаа.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди. Бүхыдөө Буряад уласай болбосоролой һалбарида 34 объект заһабарилга, барилга, һэльбэн шэнэдхэлгэдэ 1,4 миллиард түхэригэй Алас Дурнын федеральна тойрогой тэдхэмжэ үзүүлэгдэхэ юм.
Буряад Уласай Болбосоролой болон эрдэм ухаанай яаманай мэдээсэлэй албанай гэрэл зураг
.
