Апрелиин 1-һээ улас дотор бог шорой суглуулха, усадхаха талаар уласай эмхи ажалаа эхилбэ. Энээн тухай Буряад уласай байгаалиин нөөсэнүүдэй сайд Вадим Кантор засагай газарай суглаанда хэлэбэ.
«Апрелиин 1-һээ улас дотор бог шорой суглуулха, усадхаха талаар уласай эмхи ажалаа эхилбэ. Бэлэдхэлэй ехэ ажал хэгдээ. Бог шорой суглуулха, усадхаха эмхи техникэ бэлдэжэ, хэлсээнүүдые баталаа. Бог шорой шэрэхын түлөө түлбэри суглуулхаһаа урид, ажаһуугшад тэдэнэй ажал хараха ёһотой», - гэжэ Вадим Кантор онсолбо. Байгаалиин нөөсэнүүдэй сайдай тэмдэглэһээр, Буряад Улас бог, хаядаһа хуряахын түлөө эгээ бага түлбэритэй 20 можо нютагай тоодо ороно.
Буряад уласай дэбисхэр бог шорой суглуулха,шэрэхэ, усадхаха талаар 3 газарта хубаагданхай. Нэгэдэхи газарта Улаан-Үдэ, Северобайкальск хото, Ивалга, Тарбагатай, Бэшүүр, Мухар-Шэбэр, Аха, Түнхэн, Ярууна, Хэжэнгэ, Хори, Загарай, Хойто Байгалай, Муяын, Бабантын аймагууд хабаатай. Баргажан, Кабанск, Хурамхаан, Байгал шадарай аймагууд хоёрдохи газар болоно. Зэдэ, Захаамин, Хяагта, Сэлэнгэ аймагууд гурбадахи газарта ороно. Уласай тарифуудай талаар албанай хүтэлбэрилэгшэ Борис Хмелевэй хэлэһээр, эдэ гурбан газарта гурбалжан метрэй бог, хаядаһанай түлөө сэн байгуулагдаа.
Буряад Уласай Байгаалиин нөөсэнүүдэй яаманай бог шоройн нормативай ёһоор, 2019 оной апрелиин1-һээ бог хаядаһанай түлөө нэгэ хүнэй түлбэри һарын 67,76 түхэриг (нэгэдэхи газарта), 66,91 түхэриг (хоёрдохи газарта), 64,21 түхэриг (гурбадахаи газарта) гэһэн сэн байгуулагдаа.
Вадим Канторай хэлэһэнэй ёһоор, бог, хаядаһа шэрэхэ талаар асуудалнуудаар 46-06-16 гэһэн утаһаар хонходожо болоно. Тиихэдэ Байгаалиин нөөсэнүүдэй яаманай сайтда энэ асуудалаар тодорхой мэдээсэл үгтэнхэй.