​​Мэдээжэ тамиршанай габьяада хүртөө

Буряад угсаатанай урдаа хараха хүбүүн, һур харбалгаар СССР-эй спортын габьяата мастер Мунко-Бадра Дашицыреновэй мүнхэ дурасхаалда зорюулагдаһан бүхэроссиин мүрысөөн Үбэр Байгалай хизаарай Могойто тосхондо үнгэргэгдэбэ. Эндэ Буряад Уласай тамиршад дүрбэн медаль абаһан байна.

Мунко-Бадра Дашицыренов хадаа “Дружба-84” гэһэн уласхоорондын наадануудай чемпион болоһон байна. Тэрэ СССР-эй болон Европын чемпионой нэрэ зэргэнүүдтэ хүртөө бэлэй. Энэ болон бусад мүрысөөнүүдтэ амжалтатайгаар хабаадаһан габьяа ехэ тамиршанда “Хүндэлэлэй тэмдэг” зүүлгэгдэһэн юм.

1997 ондо суута тамиршан өөрын шангуудые байгуулаад, мүрысөө эмхидхэжэ эхилээ һэн. 2000 ондо наһан болоходонь, мүрысөөн болюулагдаа. Харин 2004 ондо нүхэдынь энэ хэмжээ ябуулга һэргээгээ. 2007 онһоо хойшо энэнь бүхэроссиин мүрысөөн болгогдожо, тэрээндэ хабаадагшад “Ородой спортын мастер” гэһэн нэрэ зэргэдэ хүртэхэ аргатай болоо һэн.

Мүнөө жэл эндэ зургаан тамиршан мастерай нэрэ зэргэдэ хүртөө. Буряад Уласай Эрдэм Табаев Сергей Цыренов хоёр тэдэнэй тоодо оролсожо, суута тамиршанай аба эжы Батомунко Дашицыренович болон Димид Жимбуевнагай шангуудта хүртөө.

Хубиин тоосоондо Виктория Харитонова шангай хоёрдохи һуури эзэлээ. Тэрэ финалда Үбэр Байгалай хизаарай түлөө харбадаг Ирина Дашанимаевада диилдээ. Түрүүлһэн тамиршан Буряад Уласта һур харбалгаар Софья Халудоровагай ударидалга доро һорилго хэжэ эхилһэн юм.

Буряад Уласай тамиршад үшөө гурбан хүрэл медальнуудые командна тоосоондо абаһан байна. Командна бүридэлдэ Аюна Манханова, Виктория Харитонова, Содэмидэ Батусыжэнь, Лхама Жабон, Дарима Лубсанова, Иринчина Шобоева, Александр Калгин, Бэликто Сабкеев болон Владислав Эрдынеев гэгшэд оролсожо, амжалтануудые туйлаа.

Ага тойрогой захиргаанай зураг