Буряад Уласай клиническэ онкодиспансерэй поликлиникын барилга дүүрэжэ, ашаглалгада тушаагдаха талаар ажал ябуулагдана. Байгша оной апрель һарада энэ эмхи Буряад Уласай элүүрые хамгаалгын яаманда дамжуулагдаха юм. Энээн тухай Буряад Уласай Засагай газарай Түрүүлэгшын хангалгын байгууламжа хүгжөөхэ талаар орлогшо Евгений Луковников хэлэбэ.
5 мянган дүрбэлжэн метрһээ дээшэ талмайтай, 4 дабхар хоёр корпустой байшанда барилгын, шэрдэлгэ-будалгын ажалнууд хэгдэжэ, эмнэлгын хэрэгсэлнүүд табигдаа.
Улаан-Үдэдэ хабдарта үбшэнэй диспансерэй барилга 2011 оной август һарада эхилээ. 2013 оной май һарада нэгэ таһаг ашаглалгада тушаагдаһан байна. 2016 ондо федеральна һанһаа мүнгэн һомологдохоо болижо, барилга тогтошоо һэн. 2017 оной август һарада Буряад Уласай Толгойлогшын уялга дүүргэгшэ Алексей Цыденов Ородой Холбоото Уласай Юрэнхылэгшэ Владимир Путинтай уулзаха үедөө, онкодиспансерэй барилга дүүргэхэ тухай хэлэһэн байна. 2018 оной февраль һарада Буряадай Толгойлогшо Ородой Холбоото Уласай элүүрые хамгаалгын яамантай хэлсээ баталжа, федеральна һанһаа 2,7 миллиард түхэриг һомологдожо, барилгын ажал дахинаа эхилээ.
Евгений Луковниковой тэмдэглэһэнэй ёһоор, Буряад уласай Толгойлогшын оролдолгоор поликлиникын барилга дүүрэһэн байна.
Мүнөө байһан поликлиникын байшан аяар 1964 ондо баригдаһан юм.
- Ашаглалгада тушааха тухай дансануудые абажа, удаань энэ эмхиеэ элүүрые хамгаалгын яаманда дамжуулхабди. Уласай болон федеральна һанһаа 1,1 миллиард түхэриг һомологдожо, тэрэнэй 60 хубинь эмнэлгын хэрэгсэлнүүдые худалдан абалгада дамжуулагдаа, - гэжэ барилгын сайд Николай Рузавин хэлэбэ.
Хабдарта үбшэнэй ахамад эмшэн Инесса Шагдуровагай хэлэһээр, шэнэ поликлиникэдэ богони болзорто, һайн шанартайгаар шэнжэлгэнүүд хэгдэхэ. Хабдарта үбшэнэй эмшэдэй тоо олошоруулагдаха, шэнэ таһагууд нээгдэхэ юм. Поликлиникын ашаглалгада тушаагдаһанай удаа эмшэлэлгын-лабораторно корпусой барилга 2020 оной июнь һарада эхилхэ гэжэ түсэблэгдэнхэй.