597
Байгал далайн ариг сэбэрые хамгаалха талаар мүнөө үеын эрилтэнүүдтэ таараһан сэбэрлэлгын түхеэрэлгэнүүдые бариха шухала. Байгал далайда ородог уһа голой 94 хубинь Буряадай дэбисхэртэ оршоно. 2010 оной Ородой Холбоото Уласай Байгаалиин нөөсэнүүдэй яаманай абаһан 63-дахи тогтоолдо Байгал далайда хамгаалха талаар хэмжээнүүдэй эрилтэнүүд эрид дээшэлүүлэгдэнхэй, тэрэнэй ёһоор сэбэрлэлгын түхеэрэлгэнүүдэй барилга бэелүүлэгдэхээр бэшэ. Энээн тухай апрелиин 5-да Москва хотодо үнгэргэгдэһэн «Байгал далай сахин хамгаалга: эрхын талаар асуудалнуудые гуримшуулга» гэһэн хуралдаанда хэлсэһэн байна.
Энэ хэмжээ ябуулгада Буряад Уласай Толгойлогшо Алексей Цыденов, Ородой Холбоото Уласай Байгаалиин нөөсэнүүдэй болон экологиин сайдай орлогшо Иван Валентик, Гүрэнэй Дүүмын байгаалиин нөөсэнүүдэй, газарай харилсаануудай талаар орлогшо Николай Будуев, Ород гүрэнэй эрдэмэй академиин Сибириин таһагай байгаали ашаглалгын Байгалай институдай захирал Ендон Гармаев, «Мосводоканал» эмхиин ахамад инженерэй орлогшо Сергей Стрельцов гэгшэд хабаадаа.
2024 он болотор Буряад уласта «Байгал далай сахин хамгаалга» гэһэн үндэһэтэнэй түсэлэй хэмжээндэ сэбэрлэлгын 21 түхеэрэлгэ барихаар түсэблэгдэнэ. Барилгын ажалнуудта 9 миллиард түхэриг гаргашалагдаха. Байгал далайда хамгаалха талаар хэмжээнүүдэй эрилтэнүүдэй эрид дээшэлүүлэгдэһэн ушарһаа, барилгын ажал эхилхын аргагүй.
Тиигэжэ 2010 ондо Ородой Холбоото Уласай Байгаалиин нөөсэнүүдэй яамаанда 63-дахи тогтоолой абтаһан сагһаа хойшо, сэбэрлэлгын нэгэшье түхеэрэлгэ баригдаагүй. 1975-1980-яад онуудта баригдаһан сэбэрлэлгын түхеэрэлгэнүүд мүнөө хүдэлнэ. Эдэ объектнүүдэй хуушарһаниинь ойлгосотой.
Ородой Холбоото Уласай Байгаалиин нөөсэнүүдэй болон экологиин сайдай орлогшо Иван Валентигэй хэлэһээр, 63-дахи тогтоолдо заяандашье бэелүүлэгдэхээр бэшэ нормативууд абтанхай.
- Эндэ хэлэгдэһэн технологинууд Ородой Холбоото Улас доторшье дэлхэйдэшье үгы. Эдэ эрилтэнүүдые оршон тойрондоо тааруу болгоогүй һаа, фантазёрнууд шэгтээ үлэхэбди. Шэнэлэгдэһэн тогтоолдо дэлхэйдэ хэрэглэгдэдэг эрхим технологи ашаглагдаха. Тэрэнэй ашаар, Байгал далайда сэбэрлэлгын шэнэ түхеэрэлгэнүүд баригдаха. Тиигэбэшье Байгалай дэргэдэ баригдаха сэбэрлэлгын түхеэрэлгэнүүдтэ Ородой Холбоото Уласай сэбэрлэлгын бусад объектнүүдтэ орходоо, эрилтэнүүдынь эрид шанга гээд тэмдэглэлтэй, - гэжэ Иван Валентик тайлбарилба.
Буряад Уласай Толгойлогшо Алексей Цыденовэй хэлэһээр, хүлеэжэ һуунгүй, мүнөө ажал ябуулха шухала.
- Байгал далай сахин хамгаалга хадаа шухала зорилго. 2030, 2050 он хүлеэжэ байха бэшэ, мүнөө шиидхэбэринүүдые абажа, ажал ябуулха хэрэгтэй, - гэжэ уласай хүтэлбэрилэгшэ тэмдэглэбэ.
2010 ондо Ородой Холбоото Уласай Байгаалиин нөөсэнүүдэй яаманда абтаһан 63-дахи тогтоолдо хубилалтануудые оруулха гэжэ мэргэжэлтэ шүүбэришэд дэмжэһэн байна.
Ородой Холбоото Уласай Байгалиин нөөсэнүүдэй яаманда Байгал далай сахин хамгаалха талаар асуудалнуудта олониитын һанамжа хараадаа абаха тухай мэдүүлбэ.
