Буряадта «Алас Дурнын гектар» гэһэн программада орохогүй нангин шүтөөнэй газарнуудые элирүүлхэ талаар ажал үргэлжэлүүлэгдэнэ. Нэн түрүүн энэ программа тухай хуулида Байгалай байгаалиин дэбисхэртэ газар хубаахагүй тухай хубилалтанууд орууулагдаха юм.
Буряад уласай зөөриин болон газарай харилсаанай талаар яаманда «Алас Дурнын гектар» гэһэн программада Улаан-Үдэ хото, тэрэниие тойруулаад 20 модоной зайн газар болон мүргэл, шүтөөнтэй газарнуудые оруулхагүй талаар ажал ябуулагдана.
- Мүргэлтэй газарнууд, аршаан булагуудые нангин шүтөөнэй газар гэжэ тэмдэглээд хубаарида орохогүй хорюултай газарта оруулха гэжэ дурадхагдана, - гэжэ Буряад уласай зөөриин болон газарай харилсаанай талаар сайд Маргарита Магомедова хэлэнэ.
«На Дальний Восток» гэһэн федеральна мэдээсэлэй системэдэ нангин шүтөөнэй 750 газар «Алас Дурнын гектар» гэһэн программада орохогүй тухай мэдээсэл Росреестртэ оруулагдаа. Тэдэнэй тоодо, Баргажан аймагай «Янжима бурхан», «Буха-Шулуун», Ородой Холбоото Улас дотор эгээл томо Джарун Хашорай субарга болон бусад нангин шүтөөнэй газарнууд.
Буряад уласай аймагуудта хорюултай газарнууд тухай мэдээсэл суглуулагдаһаар, тиимэһээ «Алас Дурнын гектар» программын бэелүүлэгдэжэ эхилхэдэ, нангин шүтөөнэй газарнуудай бүридхэл мэдээжэ болохо.
«Алас Дурнын гектар» гэһэн программада Ородой Холбоото Уласай эрхэтэн бүхэн хабаадажа, Алас Дурнын федеральна тойрогто 1 гектар хүрэтэр газар абаха эрхэтэй. Дэлхэйн алишье зүгһөө газар абаха тухай мэдүүлгэ оруулжа болоно. Түрүүшын жэлдэ газар абаха тухай мэдүүлгэ оруулһан хүн, тэрэнээ яажа ашаглаха тухай элирүүлжэ, гурбан жэлэй үнгэрхэдэ газар эзэмдэһэн тухай деклараци бүтээхэ юм. Ямаршье түлбэригүй 4,5 жэлэй туршада газар ашаглаһанай удаа, тэрэ гектараа өөрын мэдэлэй болгожо гү, али удаан сагта түлбэритөөр ашаглаха аргатай.
Федеральна хуулиин ёһоор, Буряад уласай дэбисхэртэ «Алас Дурнын гектар» гэһэн программа 2019 оной июлиин 1-һээ бэелүүлэгдэжэ эхилхэ. Тиихэдэ энэ болзорһоо тус программада ганса уласаймнай ажаһуугшад хабаадаха. 2020 оной февралиин 1-һээ Алас Дурнын федеральна тойрогой ажаһуугшад Буряадта газар абаха аргатай болохо. 2020 оной августын 1-һээ Оро гүрэнэй бүхы ажаһуугшад энэ программада хабаадажа эхилхэ гээд тэмдэглэлтэй.