654
2019 ондо Буряад Уласай Красный Яр нютагай һургуули заһабарилгада Алас Дурнын тойрогой тэдхэмжын хэмжээндэ 9,6 саяһаа дээшэ мүнгэн шэглүүлэгдэхэ.
Дүшөөд жэлэй саана баригдаһан хүүгэдэй сэсэрлигэй хоёр дабхар байшанда һургуули хүдэлжэ, 1997 ондо һэльбэн шэнэлэгдэһэн юм. Энэ һургуулида Романово, Жилино, Новая Деревня, Красный Яр нютагуудай 58 үхибүүд һурана. Тиихэдэ һургуули шадарай хүүгэдэй сэсэрлигтэ 13 үхибүүд ябана. Красный Ярта эгээл дүтэ оршодог Байгало-Хүдэриин һургуули болотор 10 модон гээд тэмдэглэлтэй.
2017 ондо һургуулиин байшан сэгнэһэн комисси болбосоролой эмхидэ ехэ заһабари хэжэ, тамирай заал бариха гэжэ шиидхэһэн байна. Мүнөө дулаагаар, уһан хангалгын соргонуудые, үүдэ, сонхын можо, тотого һэльбэн шэнэлхэ, байшан дулаалха, худаг малтаха ажалда мүнгэн һомологдохо.
2018 ондо «Болбосорол хүгжөөлгэ» гэһэн гүрэнэй программын хэмжээндэ Буряад уласта болбосоролой 26 эмхидэ һэльбэн шэнэлэлгын ажалнуудта 174,3 сая түхэриг гаргашалагдаһан байна.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди.
