864
Баир Дышеновэй «Шарнохой – Жёлтый пёс» гэһэн уран һайханай фильм Москвагай уласхоорондын 41-дэхи кинофестивальда байгша оной апрелиин 21-дэ харуулагдаха. «Буряткино» киностудида буулгагдаһан уран һайханай фильмтэй танилсуулга «Октябрь» кинотеатрта «Спектр» программын хэмжээндэ эмхидхэгдэхэ юм.
Хэдэн жэлэй туршада ажал ябуулагдажа, 2018 оной намар «Шарнохой – Жёлтый пёс» гэһэн уран һайханай фильм Баир Дышенов буулгажа дүүргээ. Үнгэрһэн жэлэй һүүл багта Буряад уласай соёлой яаман тус кино дэмжэһэн байна. Буряадай ниислэл хото - Улаан-Үдэ, Захаамин, Ивалга аймагуудаар кино буулгагдаһан юм. Баир Протасов, Баярма Бобоева, Саяна Цыдыпова, Николай Соктоев, Чимит Дондоков, Майдари Лодоев, Галина Галсанова, Жаргал Лодоев, Марта Зориктуева, Батор Санданов гэгшэд Баир Дышеновэй кинодо наадаһан байна.
Бөөлэжэ байһан бөөе алаһан ушарһаа хэдэн үе дамжаһан угай хараал уран һайханай фильмын гол геройн хуби заяанда дайралдана. Үнгэрһэншье, мүнөөшье саг худхалдажа, эди шэдитэ үйлэ хэрэгүүд кинодо харуулагдана.
Буряадай ажаһуугшад байгша оной намар Улаан-Үдын кинотеатрнуудта «Шарнохой – Жёлтый пёс» гэһэн кино хараха аргатай.
Тобшо мэдээн.
Москвагай уласхоорондын кинофестивальда анха түрүүшынхиеэ 1935 ондо үнгэргэгдэжэ, хэмжээ ябуулгын жюриин түрүүлэгшэ Сергей Эйзенштейн болоһон байна. Харин 1959 онһоо хойшо энэ кинофестиваль заншалта болгогдожо, түүхэеэ һэргээһэн намтартай. Москвагай уласхоорондын кинофестиваль Никита Михалков 1999 онһоо хүтэлбэрилжэ, хэмжээ ябуулга жэл бүри үнгэргэгдэдэг болоһон байна. Федерико Феллини, Валерио Дзурлини, Анна Маньяни, Микеланджело Антониони, Пьетро Джерми, Лилиан Гиш, София Лорен, Элизабет Тейлор, Ричард Бартон, Анна Карина, Симона Синьоре, Жан Марэ, Ив Монтан, Чжан Имоу, Ким Ки Дук болон бусад хэмжээ ябуулгада хабадаажа, кинофестивалиин түүхэдэ оронхой юм.
Буряад Уласай соёлой яаманай мэдээсэлэй албанай гэрэл зураг
