Главная / Новости /Общество / Буряад уласай зарим аймагуудта түймэрэй аюултай хаһын онсо гурим соносхогдоо

Буряад уласай зарим аймагуудта түймэрэй аюултай хаһын онсо гурим соносхогдоо

16-04-2019

Буряад уласта байгша оной апрелиин 15-һаа түймэрэй аюултай хаһын онсо гурим соносхогдобо.

«Түймэрэй аюулгүй байдал тухай» гэһэн федеральна хуулиин, «Буряад Уласта түймэрэй аюулгүй байдал тухай» гэһэн Буряадай хуулиин ёһоор уласай Засагай газар түймэрэй аюултай хаһын онсо гурим Баргажан, Бэшүүр, Зэдэ, Ярууна, Загарай, Захаамин, Ивалга, Кабанск, Хэжэнгэ, Хяагта, Мухар-Шэбэр, Аха, Сэлэнгэ, Тарбагатай, Түнхэн, Хори, Байгал шадарай аймагууд болон Улаан-Үдэ хотодо соносхобо.

Тиихэдэ Бабанта, Хурамхаан, Муяын, Хойто-Байгалай аймагууд болон Северобайкальск хотодо түймэрэй аюултай хаһын онсо байдалай гурим майн 1-һээ соносхогдохо.

Түймэрэй аюултай хаһан онсо гуримай үедэ түүдэг носоохо, хагда, бог шорой галдаха хоригдоно. Эдэ ажал ойн түймэрнүүдые һэргылэн, хуулиин ёһоор тусхай эмхинүүд үнгэргэхэ аргатай.

Эдэ дүримүүдтэ хайша хэрэгээр хандабал, эрхэтэд 4 мянга хүрэтэр, харюусалгата нюурнууд - 30 мянга хүрэтэр, юридическэ нюур байгуулангүй, олзын хэрэг эрхилэгшэд - 40 мянга хүрэтэр, юридическэ нюурнууд 400 мянга хүрэтэр ялада тохогдохо юм. 


Теги: Буряад Улас түймэрэй аюултай хаһа



Наши издания