850
Байгша оной апрелиин 22-28-най үдэрнүүдтэ Буряад уласай ажаһуугшад зэд мүнгэ тушаажа, тэрэнээ саарһан мүнгэн болгохо аргатай. Энэ хэмжээ ябуулга түлбэригүйгөөр Россиин Банкын Буряадтахи таһаг эмхидхэнэ.
Буряад уласай ажаһуугшадта 7 сая зэд мүнгэн хадагалаатай гэжэ банкын хүдэлмэрилэгшэд тоолоно.
- Зэд хадаа мүнгэн болоно, тэрээниие хадагалжа байнгүй, сэхэ хэрэглэхэ хэрэгтэй. Энэ акциин ашаар хадагалаатай хашарһан түлбэридэ хэрэглэгдэхэ, - гэжэ Россиин Банкын Буряадтахи таһагай хүтэлбэрилэгшын орлогшо Борис Цыденов хэлэбэ.
Банкын мэдээсэлээр, жэл бүри 10 саяһаа доошо бэшэ зэд мүнгэн бүтээгдэдэг. Хэды тиибэшье, наймаан болон транспортын һалбарида бутархай мүнгэн дуталдадаг. Үнгэрһэн жэлэй хэмжээ ябуулгын үедэ Буряадай ажаһуугшад хахад тонноһоо дээшэ мүнгэ тушаагаа. 2017 онтой жэшэхэдэ, энэ хэмжээн 4 дахин дээшэлээ.
- Байгша ондо хэмжээ ябуулга анха түрүүшынхиеэ Буряадай бүхы дэбисхэрэй банкын таһагуудта эмхидхэгдэхэ. Тус акцида хабаадагшад урмашуулагдаха. Нэгэдэхеэр, зэд мүнгэ саарһан мүнгэн болгооходоо, ямаршье түлбэри түлэхэгүй, хоёрдохёор, эгээл эдэбхитэй хабаадагшадта алибаа хэмжээ ябуулгада дашарамдуулан гаргаһан мүнгэн барюулагдаха, - гэжэ Россиин Банкын Буряадтахи таһагай мэдээсэлэй албанда хэлэбэ.
