​​«Түгнын талын алтан гургалдай»

Баясхалан Санжицыренов

Мухар-Шэбэр аймагай түб тосхоной соёлой ордон соо“Түгнын талын алтан гургалдай” гэһэн заншалта урилдаан апрелиин 12-то юһэдэхиеэ эмхидхэгдэбэ. Тиигэжэ Боомой,Нарһатын, Хүсөөтын, Галтайн,Шаралдайн, Хонхолын, Шэнэ Заганай болон бусад һууринуудай ирагуу һайхан хоолойтой бэлигтэйшүүл нэгэ тайзан дээрэ суглараа.

Түрүүшын жэлнүүдтэ энэ урилдаанда ганса Мухар-Шэбэр тосхоной ажаһуугшад хабаададаг байгаа. Арадай Хуралай һунгамал Зоригто Цыбикмитов энэ урилдаад эмжэжэ, аймагай хэмжээндэ гаргаа.

Жэлһээ жэлдэ энэ урилдаан улам үргэн дэлисэтэй болоно гээд, аймагай захиргаанай соёлой таһагай гол мэргэжэлтэн Сэндэма Цыдыпова тэмдэглэхэдээ:

«Багшанар, эмшэд, тогоошод, жолоошод болон бусад мэргэжэлтэн хаба шадалаа туршалсана”, - гэжэ нэмэнэ.

Дуушадай урилдаанда энэ удаа 35 хүн оролсохо хүсэлтэй байһанаа мэдүүлээ. Тиигэжэ шэлэн абалгын шатые 18 хүниинь дабажа, түгэсхэлэй шатада гараа.

Буряад Уласай габьяата артист Мэдэгма Доржиева түрүүтэй жюриин гэшүүд хабаадагшадай талаан бэлиг сэгнэһэн байна. Лауреадай үндэр нэрэ зэргэдэ Галтайн хүбүүн Баясхалан Санжицыренов хүртөө. Жолоошоноор хүдэлдэг Баясхаланда 15 мянган түхэригэй мүнгэн шан барюулагдаа.

Дашима Цыдыпова