881
Байгша оной июниин 18-һаа Улаан-Үдэ-Москва, Москва-Улаан-Үдэ гэһэн замаар «Cмартавиа» авиакомпаниин самолёдууд ниидэжэ эхилхэ. Хүнгэлэлтэй биледүүдые 6200 түхэригөөр 23 наһа хүрэтэр залуушуул, 55 наһанһаа эгэшэ эхэнэрнүүд болон 60 наһанһаа дээшэ эрэшүүл, олон үхибүүдтэй гэр бүлэнүүд, эрэмдэг бэетэй хүнүүд болон тэдэниие хаража ябаһан хүнүүд абаха аргатай.
Байгша оной мартын 29-дэ Алас Дурнын федеральна тойрогой авиа замаар хүнүүдые шэрэхэ талаар Росавиацида тэдхэмжэ үзүүлхэ тухай шиидхэбэри Ородой Холбоото Уласай Засагай газарта абтаһан байна.
- Алас Дурнын федеральна тойрогой бүридэлдэ оруулагдаһанай ашаар, Улаан-Үдэ-Москва, Москва-Улаан-Үдэ замда самолёдоор ниидэлгэдэ мүнгэн һомологдоно. «Смартавиа» авиакомпани энэ талаар ажал ябуулха. Июниин 18-һаа тус авиакомпаниин самолёдууд долоон хоногой дүрбэ дахин ниидэхэ. Апрелиин 17-һоо биледүүд худалдагдаха, - гэжэ Буряад Уласай Толгойлогшо Алексей Цыденов хэлэбэ.
Тобшо мэдээн.
«Смартавиа» анхан «NORDAVIA – regional airlines» гэжэ нэрэтэй байгаа. Энэ компаниин самолёдууд Ород болон хари гүрэнүүдэй аэропортнуудта буудаг. Тиихэдэ Архангельск, Мурманск, Сыктывкар, Нарьян-Мар, Москва, Санкт-Петербург хотонуудта байрланхай. Мүнөө тэдэнэр Москва, Санкт-Петербург, Архангельск, Анапа, Мурманск, Нарьян-Мар, Сочи, Сыктывкар, Симферополь хотонуудай хоорондо ниидэдэг. «Смартавиа» авиакомпаниин самолёдуудай ниидэдэг газарнуудай дунда Улаан-Үдэ эгээл зүүн зүгынь болоно гээд тэмдэглэлтэй.
