Байгша оной май һарын туршада Эсэгэ ороноо хамгаалгын Агууехэ дайнай ветеранууд түмэр харгыгаар түлбэригүйгөөр ябаха аргатай. Тус хэмжээ ябуулга Агуу Илалтын 74 жэлэй ойн баярта дашарамдуулан «РЖД» холдинг эмхидхэнэ. Тиихэдэ дайнай ветеранууд Ород гүрэн дотор холын замай «Сапсан», «Ласточка» поезднуудаар түлбэригүй ябаха юм. Тэдэниие хаража ябаха хүн баһал түлбэригүйгөөр ябалсаха.
2019 оной май һарада тус акци эмхидхэгдэжэ, хэды дахин ябахаб гэһэн хизаарлалтагүй юм. Холын замда гараха түлбэригүй билет мүнөө абажа болоно. Тиихэдээ паспорт, Эсэгэ ороноо хамгаалагшын үнэмшэлгэ, «За оборону Ленинграда» гэһэн медаляар шагнагдаһан тухай үнэмшэлгэ харуулха хэрэгтэй. Хари гүрэнүүдэй ажаһуугшад СССР гүрэндэ 1992 оной январиин 1 хүрэтэр хүсэндөө байһан дансануудаар билет абаха аргатай.
Буряад Уласай дэбисхэртэ 2019 оной майн 9-һөө 12 болотор Эсэгэ ороноо хамгаалыгн Агууехэ дайнай ветеранууд, тэдэниие хараха хүнтэй түлбэригүй ябаха аргатай. «Байкальская ППК» гэһэн бүлгэм энэ хэмжээ ябуулга эмхидхэнэ.
Буряадайнгаа дэбисхэртэ түмэр харгыгаар ябаха хүсэлтэй ветеранууд 10 үдэр урид түлбэригүй билет абаха болоно.