943
Буряад Уласай Толгойлогшо Алексей Цыденовэй хүтэлбэри доро үнгэргэгдэһэн түсэблэлгын суглаанда уласай ойн ажахын агентствын хүтэлбэрилэгшэ Александр Мартыновай хэлэһэнэй ёһоор, Буряад уласта түймэрнүүд ехэнхидээ ажаһуугшадай гэмээр һүжэрнэ.
Ажаһуугшадай ажаябуулгаһаа - 52 түймэр, хүдөө ажахын болон Баталан хамгаалалгын яаманай газарһаа - 16 түймэр, хагда галдаһан ушарһаа 9 түймэр соробхилоо. Тиихэдэ Үбэр Байгалай хизаарта гараһан түймэр Буряадта хүрэжэ, тэрэ сарагдаа. Хүршэ можодо түймэрэй аюултай хаһын онсо байдал соносхогдоо гээд тэмдэглэлтэй.
Улас дотор ойн түймэрэй гарахагүйн тула байдал хинагдана, ажаһуугшадтай һэргылэмжын ажал ябуулагдана.
- Апрелиин 18-да Хандагатайн ойн ажахыда гараһан түймэр Кижа һууринда аюултай байбашье, унтараажа шадаабди. Үбэр Байгалай хизаарта түймэр саралгада хабаадаабди. Мүнөө хүршэ можотой хилэ шадар түймэрэй аюулгүй байдал сахиха талаар шалгалтанууд олоор үнгэргэгдэнэ, - гэжэ Александр Мартынов хэлэбэ.
Түймэрэй аюулгүй байдал сахиха талаар ойн харуулшад һэргылэмжын ажал эдэбхитэй ябуулна. Байгша ондо ойдо амарха газарнууд нёдондонойхидо орходоо, хоёр дахин ехэ байха гэжэ хараалагдана.
Холо оршодог Кикагай, Усть-Баргажанай, Байкальск, Хори, Байгал шадарай ойн ажахынуудта шалгалтын-пропускной пунктнууд хүдэлхэ. Энээнэй ашаар, үнгэрһэн жэлдэ ойн түймэрнүүд гараагүй гэжэ ойн харуулшад тэмдэглэнэ.
Буряад Уласай Толгойлогшо Алексей Цыденов аймагуудай хүтэлбэрилэгшэдтэ түймэрэй аюулгүй байдал сахиха талаар хинажа байха тухай даалгаба.
- Түймэрэй аюулгүй байдал сахиха гэжэ ехэ анхаралтай байха шухала. Үбэр Байгалай хизаарта тохёолдоһон байдал дабтахагүйн тула, хиналта үнгэргэгдэжэ байха ёһотой. Байгша ондо нёдондонойхидо орходоо, бүри хүшэр байхаар хүлеэгдэнэ: саһа, бороо багатай, һалхитай, эртэ дулаараа, - гэжэ уласай хүтэлбэрилэгшэ тэмдэглэбэ.
Байгша оной апрелиин 15-һаа Буряад уласта түймэрэй аюултай хаһын онсо гурим соносхогдоо. Энэ гуримай үедэ ойдо орохо, хагда, бог шорой галдаха хоригдоно гэжэ һануулнабди.
Тиихэдэ Буряадай Толгойлогшо ниигэмэй хамгаалгын яаманда Улаан-Үдэдэ түймэрһөө хохидоһон олон үхибүүдтэй гэр бүлэдэ туһа хүргэхэ талаар асуудал шиидхэхэ гэжэ даалгаба.
- Энэ асуудал шиидхэгдэнэ. Мүнөө гэр бүлэдэ 110 мянган түхэриг дамжуулагдаха. Хотын захиргаан туһа хүргэхөөр найдуулаа, - гэжэ Буряад Уласай ниигэмэй хамгаалгын сайд Татьяна Быкова харюусаба.
Үнгэрһэн үдэрэй туршада Буряад уласта Загарай, Хори аймагууд болон Түнхэнэй дархан газарта ойн 4 түймэр гараһан байна. Жэлэй эхилһэнһээ хойшо уласай дэбисхэртэ 967 гектар талмайда 83 ойн түймэр гараа гэжэ уласай ойн ажахын агентство мэдээсэнэ.
Алас Дурнын федеральна тойрогой Приморско хизаарта 49 мянган гектар талмайда 415 түймэр һүжэрөө, Хабаровска хизаарта 104,3 мянган гектарта -184, Үбэр Байгалай хизаарта 30,2 мянган гектарта 181 түймэр гараһан тухай бүридхэлдэ абтаа.
