1114
Мүнөөдэр, апрелиин 23-да, Буряад Уласай Засагай газарта Красноярск хотодо илалта туйлаһан Алиса Жамбалова тэрэнэй һоригшо Саян Жамбалов хоёрые ёһолон хүндэлөө. XXIX Бүхэдэлхэйн үбэлэй универсиадада дүрбэн алтан медальда хүртэһэн Алиса Жамбалова, тэрэнэй һоригшо, эсэгэнь Саян Жамбалов хоёрто Буряад Уласай Толгойлогшо Алексей Цыденов 3 сая 62 мянган түхэригэй үнэмшэлгэ – нэгэ доро түлэгдэдэг гүрэнэй преми хүн бүхэндэнь барюулаа.
- Алиса, Буряад уласайнгаа хүсэн гээшэш! Түрэлхид, һоригшод Саян Владимирович, Елена Викторовна, таанадта баяр хүргэнэб. Алиса, аргагүй ехэ ажал хэжэ, хүсэл, абари зан, бэлэдхэлэй ашаар үндэр амжалта туйлааш. Буряад уласайнгаа ажаһуугшадтаа, залуушуулдаа ёһотой жэшээ харуулааш. Ши – манай омогорхол гээшэш! Түрүүшын медаляа абахадашни, универсиадаһаа Ородой Холбоото Уласай Засагай газарай вице-премьер Ольга Юрьевна Голодец хонходожо, хэлээ һэн: «Алексей, танай басаган түрүүшын алтан медаль шүүгээ!». Бүхы гүрэн түрынгөө ажаһуугшадые баярлуулааш. Шамда ехэ баярые хүргэнэбди. Саашадаа баһал урагшатай ябахашни болтогой! – гэжэ Алексей Цыденов Алисада баяраа мэдүүлбэ.
Тиихэдэ Мухар-Шэбэр аймагай хүтэлбэрилэгшэ Владимир Молчанов болон «Түгнын уурхай» бүлгэмэй захирал Валерий Кулецкий гэгшэд баһал мүнгэнэй үнэмшэлгэнүүдые Алиса, Саян Жамбаловуудта барюулһан байна.
Нютагайм зоной дэмжэлгээр, амжалта туйлааб гэжэ Алиса Жамбалова хэлэбэ.
- Красноярск хотодо Универсиадын үнгэргэгдэһэндэ ехэ баяртайб. Түрэлхидни, минии түлөө һанаагаа үбдэһэн хүнүүд нааданда ошожо шадаа ха юм. Гэртээ урилдажа байһан мэтэ намда һанагдаа. Намай дэмжэһэндэтнай баяр хүргэнэб! – гэжэ нютагайнгаа хүнүүдтэ тамирша басаган баяр хүргэбэ.
2019 оной мартын 2-12-рой үдэрнүүдтэ Красноярск хотодо XXIX Бүхэдэлхэйн универсиада үнгэргэгдэжэ, Ородой Холбоото Уласай суглуулагдамал командын бүридэлдэ Буряадай тамиршан, санаар урилдаанай Ород гүрэнэй уласхоорондын классай спортын мастер Алиса Жамбалова хабаадалсаа. Буряадай тамирша басаган Универсиадада ори гансаараа дүрбэ дахин алтан медальда хүртэжэ шадаа гэжэ һануулнабди.
Буряад Уласай Засагай газарай мэдээсэлэй албанай гэрэл зураг
