​​Олимпиин нааданай ойртохо бүри

Эдэ үдэрнүүдтэ Алушта хотодо Ородой суглуулагдамал команда бүридхэгдэжэ байна. Ородой Кубогта хүртэхын түлөө мүрысөөн, Ородой чемпионат, залуушуулай дунда Ородой чемпионат хойно хойноһоо үнгэргэгдэнэ. Түрүүшын мүрысөөндэ хоёр алтан медаль Инна Степанова абаа.

2016 оной Олимпиин наадануудта мүнгэн медальда хүртэгшэ Инна Степанова һаяхана нютагаа ерээ һэн. Аха дүүнэрээрээ уулзажа, хада бурхадтаа мүргэжэ ошоо.

Ородой Кубогта хүртэхын түлөө энэ мүрысөөн шэлэн абалгын түрүүшын шата боложо үгөө. Эндэ Инна Степанова дүй дүршэл ехэтэй байһанаа гэршэлээ. Түгэсхэлэй уулзалгада тэрэ Ростовой можын Елена Осиповае илажа, I һуурида гараа. Командна микст тоосоондо Буряадай тамиршад баһа алтан медальда хүртөө. Инна Степанова болон Эрдэм Ирдынеев хоёр Воронежой, Краснодарай, Челябинскын болон Ростов-на-Дону хотын тамиршадые булижа шадаа.

Эдэ үдэрнүүдтэ Алуштада Ородойчемпионат үнгэргэгдэнэ. Түрүүшынмедальнууд үсэгэлдэр тараагдаа. III һуури эзэлхын түлөө тэмсээндэ Инна Степанова хабаадаха эрхэдэ хүртэһэн байна. Хубиин тоосоондо финалда Эрдэм Цыдыпов илажа шадаа. Эрэшүүлэй болон эхэнэрнүүдэй Буряадай суглуулагдамал команданууд хүрэл медаль абахын түлөө уулзалгануудта оролсоо.

Эдэ мүрысөөнүүдтэ шалгарһан тамиршад Шанхай (Хитад) болон Анталья (Турци) хотонуудта үнгэрхэ дэлхэйн Кубогта хүртэхын түлөө мүрысөөнэй шатануудые дабаха юм. Эгээл эрхим тамиршад дэлхэйн чемпионадта Ород гүрэнэйнгөө түлөө тэмсэхэ гээд хэлэхэ шухала.

Аюр САНДАНОВАЙ гэрэл зураг