Майн 12-то үнгэрхэ «Мянган адуунай найрта» Ярууна аймагай «Үльдэргэ» ажахы урина.
Үнгэрһэн жэл үргэн хэмжээндэ үльдэргынхид даага дэллээ эмхидхээ бэлэй. «Тииһэн хадаа байгша ондо үнгэргэнгүй үлэхэ гэһэмнай, олон тээһээ утаһаар залган, хэзээ хэхэтнайб гэжэ дайлажа эхилхэдэнь, дахинаа үнгэргэе гэжэ шиидээбди”, - гээд, «Үльдэргэ» ажахын захирал Булад Будажанаев дуулгаба.
Үглөөнэй 9 сагһаа «Сагаан үбгэнэй уншалга», нээлгын тоглолто үнгэрхэ. Тэрэшэлэн мори ургалга, мориной гүйдэл дунда һур харбалга, унагадай урилдаан, даага дэллээн захалха. 1200 метр зайда - дааганууд, 1600 метртэ - гунанууд, 2400 метртэ – үреэ, шүдэлэн, һоёолон, хизаалан, азарга, гүүн гүйлдэхэ. Буряад үүлтэрэй морид наһанайнгаа боломжоор аяар 8 мянган метр болотор зайда урилдаха байна. Жороо моридой урилдаха зайнь баһал тус тустаа ондоо юм.
Энэ урилдаанда оролсохо хүсэлтэйшүүл мэдүүлгэеэ [email protected] хаягаар майн 7-ой 17.00 саг болотор эльгээхэ ёһотой. Хожомдожо эльгээһэн зон урилдаанда оролсохогүй!
Холбоо бариха утаһан: 8-902-565-99-06
Сарюуна Эрдынеевагай гэрэл зураг