​Сэтгүүлшэдэй сэнтэй харилсаан

Монголой Сэтгүүлшэдэй холбооной хүтэлбэрилэгшэдтэй уулзалга

«Буряад үнэн» Хэблэлэй байшанай захирал Баяр Ширапов, орлогшо захирал Александр Махачкеев, сэтгүүлшэн Бадмажаб Гындынцыренов гэгшэд албан хэрэгээр Монгол ошожо, тэндэхи сэтгүүлшэдтэй хамтаран ажаллаха асуудалнуудаа тодорхойлжо, хэлсээ баталаа.

Зүблэлтэ засагай сагта Монголой ба Буряадай сэтгүүлшэд хани барисаатай хүдэлдэг байһан. Бэе бэедээ айлшалха, һуралсал хэхэ, мэргэжэлээ дээшэлүүлхэ ажал ехэ эдэбхитэйгээр ябуулдаг бэлэй. Илангаяа Монголой сэтгүүлшэд Ород Уласай һургуули гараһан гэжэ манай ахатан һайн мэдэхэ. Тэрэ сагһаа хойшо ехэ уһан урдаа, саг ондоо болоо – хоёр талын харилсаан таһалдаа. Һүүлэй 20 гаран жэл соо сэтгүүлшэд хоорондоо албан ёһоор ябалсаагүй байһанаа хамтаран ажаллаха заншалаа һэргээхэ хүсэл табижа байна. Тиигэжэ Буряад Уласай талаһаа, Буряад хэлэтэ сэтгүүлшэдэй эблэлэй нэрэһээ “Буряад үнэн” Хэблэлэй байшан Монголтой холбоо тогтоожо эхилбэ.

Монголдо мэргэжэлээ дээшэлүүлхэ

2018 оной ноябриин 18-да Москва хотодо Ородой Холбоото УласайСэтгүүлшэдэй холбоон ба Монгол Уласай Сэтгүүлшэдэй холбоон 5 жэлэй хугасаатай хамтаран ажаллаха тухай хэлсээ баталһан юм. Тиигэжэ тэрэнииень бэелүүлхэ зорилгоор Монгол Уласай Сэтгүүлшэдэй холбоон ба Буряад хэлэтэ сэтгүүлшэдэй эблэл хамтаран ажаллахаар болобо. Буряадай сэтгүүлшэд Монгол ошожо, мэргэжэлээ дээшэлүүлхэ хамагай ехэ хүсэлтэй байна. Сэхыень хэлэхэдэ, буряад хэлэтэ сэтгүүлшэд ород хэлэн дээрэ ябуулагдадаг семинар, мастер-классуудта ехэ хомор оролсодог. Москва гү, али Эрхүү хотодо болоһон хуралнуудта буряад хэлэтэ сурбалжалагшад ябадаггүй шахуу. Тиигээдшье буряад сэтгүүлшэдэй баруун зүгтэ эмхидхэгдэһэн һуралсалда оролсобошье, өөртөө хэрэгтэй юумэ оложо абаад, бодото ажал дээрээ хэрэгжүүлхэнь хэсүү байдаг юм даа. Юундэб гэхэдэ, тэндэ ородоор яажа зүб бэшэхэб гэжэ һургана ха юм.

Монголой Сэтгүүлшэдэй холбоониие Монгол Уласай ехэ һургуулиин багша, журналистикын һалбариин орлогшо захирал Хархүү Мандахбаяр хүтэлбэрилнэ. Буряадай түлөөлэгшэдэй ябаха үеэр тэрэ уласайнгаа Юрэнхылэгшэ Х. Баттулгатай хамта Хитад Улас ошоһон байгаа. Тиигэжэ бидэниие Монголой сэтгүүлшэдэй холбооной түрүүлэгшын орлогшо Х. Батхишиг, гүйсэдхэхы захирал Э. Болортулга, правлениин гэшүүн М. Одмандах гэгшэд угтан абаа.

«Буряад үнэн» ба Монцамэ: 100 жэлэйнгээ ой тээшэ

«Буряад үнэн» Хэблэлэй байшан ба МОНЦАМЭ хоёрой хоорондохи ажал улам эршэдэнэ. Монголой агентствын мэдээсэлнүүдые, гэрэл зурагуудые манай сонин абажа хэрэглэнэ. Буряад Уласта болоһон үйлэ хэрэгүүд тухай МОНЦАМЭ дэлхэй даяар мэдээсэжэ эхилэнхэй. 1921 ондо байгуулагдаһан МОНЦАМЭ болбол гүрэнэй үндэһэнэй мэдээсэлэй албан юм. Тиигэжэ «Буряад үнэншье» ба МОНЦАМЭ агентствэшье 2021 ондо зуун жэлэйнгээ ойн баярые угтахаяа бэлдэнэ.

МОНЦАМЭ мүнөө дээрээ үдэр бүри монгол, ород, хитад, англи, япон - 5 хэлээр сонин гаргана. Долоон хоног бүри монгол бэшэгээр “Хүмүүн бичиг” гэһэн сонин хэблэнэ. Агентствын юрэнхы редактор Н. Лхагвасүрэн Буряадай түлөөлэгшэдые угтан абажа, ород, монгол бэшэгэй редакцинуудай ажалтай танилсуулба. «Хүмүүн бичиг» сониной эмхидхэгдэдэг монгол бэшэгээр һурагшадай дунда урилдаанда Буряад талаһаа хабаадалсахые уриба. Тэрэ урилдаанда илагшад Монгол Уласай ехэ һургуулида түлбэригүй һураха эрхэдэ хүртэдэг юм байна. «Хүмүүн бичиг» сониндо монгол бэшэгэй хэшээлнүүд ходо гарана.

МОНЦАМЭ агентствэһээ гадна, “Өдрийн сониной” редакцитай танилсажа, баһал хамтаран ажаллахаар болообди. Бэе бэеһээ мэдээсэл абалсаха, сурбалжалагшадаар андалдаа хэхэ, дадалга гараха – иимэ гурбан зүйл дээрэ гол түлэб ажаллаха гэһэн хэлсээн баталагдаба.

Дүршэлыень дүүрэнхалаха

Монгол Уласта 200 сонин, сэтгүүлгарана, 700 радио, телевидени тоологдоно. Сэтгүүлшэд олон юм аабза.Энэ һалбарида техникэ технологихурдан хүгжэнэ. Тиимэһээ тэндэһээһураха, абаха юумэн манда ехэ.

Сэтгүүлшэд буряад хэлэнэйхүгжэлтэдэ гол ехэ үүргэ дүүргэдэггээд мэдээжэ. Тиимэһээ тэдэнэй хэлэн баян, хурса, сэбэр байха зэргэтэй. Монгол хэлэ, монгол бэшэг мэдэхэ гээшэ буряад хэлэтэ сэтгүүлшэнбүхэндэ табигдаха нэгэ эрилтэнь болохо ёһотой.

Александр МАХАЧКЕЕВЭЙ гэрэл зураг