2257
Алтана Улаан-Үдэ хотын 25-дахи дунда һургуули мүнөө жэл дүүргэжэ байна. Алишье талаар жэгдэ һайнаар һурадаг Алтана алтан медаляар һургуулияа түгэсэжэ, Москва хото руу дээдэ һургуулида орохо хүсэлтэй.
Алтана 3-тайхан байхаһаа удхатай уран зурагуудые зуража эхилһэн юм. Оршон байдалаа үнгэтэ будагаар оньһотойхоноор зурадаг басагаяа түрэлхидынь Мэрдыгеевэй нэрэмжэтэ уран зурагай һургуулида ябуулжа эхилһэн. Тэндэ хоёр жэл ябаад, 9 хүрэһэн Алтана хүүгэдэй “Хараса” гэһэн изостуди ябажа эхилээ.
- Эндэл ерээд, бэлигтэй багша Татьяна Александровнагай хүтэлбэри доро уран зурагай нюусатай танилсажа эхилээб. Багшамни намайе элдэб оньһон аргада һургаа. Тиихэдээл уран зурагта бүхы сэдьхэлээрээ дурлажа, бүри анхаралтайгаар хандажа эхилээб, - гэжэ Алтана хөөрэнэ.
Пейзаж, коллаж, портрет гэхэ мэтын уран зурагай бүхы шэглэлнүүдые туршаад үзөө. Мүнөө ямаршье шэглэлээр зуража шададаг болонхой.
Багшын сэдьхэлэй хэлтэрхэй
Алтанын хубиин үзэсхэлэндэ аяар 69 ажалнууд дэлгэгдээ. Иимэ олон зурагуудые бэеэ хүсэһэн лэ уран зураашан харагшадтаа дурадахаха аргатай ха юм. Эдэ ажалнуудыень хүн зондо харуулжа байхадаа, Татьяна Александровна багшань тон ехээр омогорхоно.
- Шабимни 8 жэлэй туршада эды олон ажалнуудые бүтээгээ. Харыт даа, иимэ бэлигтэй эдир зураашанай ажалнуудай саашадаа мэдээжэ болохол гэжэ бодотоор гэршэлнэ. Бэлигтэй һурагшамни минии зүрхэнэймни нэгэ яларма хэлтэрхэй гээшэ, - гэжэ багшань тэмдэглэнэ.
Алтана эндэ ябажа эхилхэдээ, номгон даруухан абари зан, дары түргэн юумэ ойлгожо, тодон абаад, өөрынгөө хараса оруулан бэелүүлжэ шадаха маягаараа багшаяа гайхуулһан юм.
- Даалгагдаһан даабарияа юрэ дүүргэхэ бэшэ, харин өөрынгөө онсо хараса оруулжа зурадаг юм. Оршон тойронхи бодото байдал, элдэб һанал бодол, өөрынгөө хараса оруулжа байгаад зохёоһон зурагуудые элдэб оньһото аргаар бүтээжэ шадаха, уран зурагай нюусатай тон дүтөөр танил, нүхэд болоһон хүн гээшэл даа. Мүнөө сагта бэлэн уран зураашан болоод байна, гэбэл алдуугүй, - гэжэ Татьяна Александровна хөөрэнэ.
Ямар нэгэ шэглэлэй оньһондо дүршэжэ, бэлиг шадабаритай боложо байһан шабинарай туйлаһан амжалта тэмдэглэхын тула, элдэб харалгануудта хабаадуулха шухала. Бэлигтэй шабинарайнгаа ажалнуудые багшань ходол энэ тэрэ урилдаануудта эльгээжэ, хабаадуулжал байдаг. Алтана хотын, Буряад Уласай, Ородой Холбоото Уласай болон Уласхоорондын “Красота божьего мира”, “Звездная эстафета” гэһэн харалгануудта амжалта туйланхай.
Алишье тээшээ тэгшэ бэлигтэй
Эдэ үдэрнүүдтэ дэлгэгдээд байһан үзэсхэлэн хэншье ошожо үзэхэ аргатай. Уран зурагай бүхы оньһото аргануудые шадабаритайгаар хэрэглэжэ бүтээгдэһэн зурагууд элдэб гаршагта зорюулагданхай.
Татьяна Шаповалова багшын 43 жэлэй дүршэлтэй, тэдэнэй 10-нь “Каприз” гэһэн модын театрта хүдэлөөд, мүнөө 15 жэлэй туршада “Хараса” гэһэн изостудида ажаллана. Эндэ үхибүүдые уран зурагай нюусатай танилсуулха сагтаа бэеэ дааһан гурбан уран зураашадые хүмүүжэлөө. Мүнөө шабинарынь: Наташа Цырендоржиева, Елена Шведова, Юлия Мисюль гээд уран зураашад болонхой. Алтанын удаа мүнөө 10-дахи ангида һуража байһан Яна Карбышева амжалта ехэтэй болонхой. Янын хубиин бүтээлнүүдэй үзэсхэлэн баһал эмхидхэгдэһэн юм.
Алтана Базаржапова иигэжэ бэлиг шадабарияа оложо, дүршэлтэй боложо, уран зураашанай харгы шэлэжэ абахаар бэлэн болонхой. Гэхэ зуура, уран зураашан бэшэ, харин хэлэ бэшэгэй эрдэм шэнжэлхэ эрдэмтэн болохо хүсэлтэй.
- Минии уг гарбалда уран зураашад үгы. Харин хэлэ бэшэгэй талаар мэргэжэлтэд олон. Абамни соёлдо хабаатай мэргэжэлтэй бэшэшье һаа, ехэ зохидхоноор юумэ зуражашхидаг, юумэ зохёон бэшэжэрхидэг. Тиимэ өөрын бэлигтэй бшуу. Би хэлэ, уран зохёолой шэглэлээр дээдын эрдэмтэй болохоб, - гэжэ Алтана мэдээсэбэ.
Бэлигтэй хүн алишье талаһаа жэгдэ бэлигтэй байдаг. Ямар нэгэ хүнэй шадахагүй ондоо бэлигтэй хүнэй ажабайдал һонин лэ ёһотой. Ганса шэлэһэн мэргэжэлээрээ ажаллаад һууха бэшэ, хүгжэмтэ зэмсэг дээрэ наадажа, дуу дуулаха, зураг зураха, тамираар бэеэ һорихо шадабаритай хүнэй ажабайдал дүүрэн ха юм.
Алтанын урда үргэн харгы нээгдэнхэй. Бэлигтэй багшынгаа дамжуулһан эрдэм мэдэсэ улам хүгжөөжэ, дүй дүршэлөө алдангүй, саашань дээшэлүүлжэ ябахал байха. Ямаршье мэргэжэл шэлэжэ, эрдэм мэдэсэтэй боложо ябаг лэ даа. Хэзээ нэгэтэ Алтана Базаржаповагай хубиин удаадахи үзэсхэлэн эжэлүүдгүй эмхидхэгдэхэл байха. Харин мүнөө эдир залуухан уран зураашанай наһанай нэгэ шатын дүн согсологдобо гээшэ. Эндэ балшар бага наһандань саг соогоо бэлигыень элирүүлжэ, зүб харгы заажа үгэхэ багша ушарһаниинь тон шухала.
Цырегма САМПИЛОВА
Алтана Базаржаповагай гэрэл зурагууд
