1598
Хотын дарга холын хараатай
Бага хото һууринуудые болбосон түхэлтэй болгохо тухай федеральна программада оруулагдаһан Закаменск хотодо амаралтын шэнэ газар 2018 ондо нээгдээ бэлэй. Тэрэнь мүнөө жэл улам үргэгдэхэ юм. Гэхэтэй хамта, Закаменск хотын ажаһуугшад гэр байрынгаа газаахиие зохид болгоно.
Крупскаягай нэрэмжэтэ үйлсэдэ, Седлецкиин болон Невскиин сквернүүдтэ амаралтын шэнэ газар оршоно. Закаменск хотын мэр Евгений Поляковой мэдээсэһээр, энэ хэрэгтэ 8,5 сая түхэриг гаргашалагдаа.
- Урдандаа ажаһуугшадай амарха газарнууд манай хотодо хомор байгаа. Гүрэнэй дэмжэлтээр иимэ һайхан газар нютагаархидтаа бэлэглэһэндээ баяртайбди. 2019 он манай Закаменск хотодо - онсо жэл гээшэ. Юундэб гэхэдэ, байгуулагдаһаар 85 жэлээ угтахань. Тиихэдэ Зэдын вольфрам молибденэй комбинатнай баһа 85 жэлэйнгээ ой тэмдэглэхэ юм. Иимэ баярта хэмжээ ябуулгануудаа энэ амаралтынгаа газарта үнгэргэхэ түсэбтэйбди, - гэжэ Евгений Поляков хөөрэнэ.
Амаралтын газарай тэг дунда фонтан байгуулагданхай. Тэрэнэй уһаниинь хэдэн зуун метр газар дороһоо абтана. Тиимэһээ фонтанһаа уһашье ууха арга бии. Буряад Уласай Толгойлогшо Алексей Цыденовые Закаменск хотодо энэл уһаараа һая угтаа бэлэй.
Амаралтын газарта видео харуулха томо экран табигданхай. Һүүлэй үедэ ойдо ушарһан онсо байдал тухай тэрээн дээрэ үдэр һүнигүй харуулагдажа байгаа. Хажуудань асари томо “З” үзэг табигданхай. Мүн тиихэдэ хюлгэ зураатай хэдэ ншэрээнүүд шатар ба даам наададаг зондо дурадхагдана. Нэгэ бага саашаа ябаад байхада, гаджет болон гар утаһаяа зарядка хэхэ газар эмхидхэгдэнхэй. Тэрэ наранай элшын хүсөөр хүдэлнэ бшуу.
Амаралтын газарай нэгэ хубинь1-5 наһанай багашуулда дурадхагдана. Харгын дүримүүдые зааһан талмай дээрэ хүбүүд, басагад дуратайгаар сагаа үнгэргэнэ. Үхибүүд велосипедээр, роллернуудаар эндэ ябаха аргатай.
- Закаменск хотын ажаһуугшад амаралтын шэнэ газарта олоороо суглардаг болонхой. “Шэнэ котельнитэй болгоо һаатнай, бүри ехэ жаргалтай байха һэмди”, - гэжэ Закаменск хотынхид хэлэнэ.
Буряад Уласай Толгойлогшо Алексей Цыденовтэ энэ асуудал тодоор табигдаа.
- Закаменск хотын котельни ехэ үнинэй юм. Холын 1963 ондо ашаглалгада тушаагдаа һэн. Үшөө комбинат тэрээниие хэрэглэдэг байгаа. Мүнөөшье болотор мазудаар түлигдэнэ. Тиихэдэ хүн зомнай дулаасуулгын түлөө тон ехэ мүнгэ түлэнэ, - гэжэ “Закаменскын ЖКХ” бүлгэмэй захирал Саян Матуев хөөрэнэ.
2018 оной һүүл багаар энэ котельнидэ түлишэнь дуталдажа, Закаменск хотын гэрнүүд хүрэшэн алдаа. Буряад Уласай Засагай газар мүнгэ һомолжо, мазут асаруулаа бэлэй. Түлишын сэн гэнтэ нэмэһэнһээ боложо, иимэ ушар тохёолдоо гэхэ хэрэгтэй.
Алексей Цыденов энэ котельниошожо, байра байдалтайнь танилсаа. Үнэхөөрөө хуушарһан котельниин хажууда Буряадай Толгойлогшо тусхай суглаа зарлаһан байна. Шэнгэрүүлһэн газ хэрэглэхэ шэнэ котельни бариха тухай шиидхэбэри абтаа.
Борис Балдановай гэрэл зураг
Автор: Борис БАЛДАНОВ
