1587
Бабанта аймагай Романовка нютагта хүүгэдэй сэсэрлигтэ эдеэ хоол шанаха газар болон Маловский һууринай һургуулида тамирай танхим Алас Дурнын тойрогой тэдхэмжын хэмжээндэ баригдаха.
Романовка нютаг «Витимок» гэһэн хүүгэдэй сэсэрлиг 1961 ондо баригдажа, гурба һаратай нарай хүүгэдэй ясли болон 8 наһатай болотор үхибүүдэй бүлэг байгуулагдаа һэн. Тэрэ гэһэнһээ хойшо хүүгэдэй сэсэрлигтэ ябаха үхибүүд олон боложо, залгалаа байшан баригдаа һэн. Гадна эдеэ хоол шанадаг газарай талмай хубилаагүй. Мүнөө хүүгэдэй сэсэрлигтэ 88 үхибүүд ябана.
- Хүүгэдэй сэсэрлигэй эдеэ хоол шанадаг газар Роспотребхиналтын эрилтэнүүдтэ тааранагүй, - гэжэ «Витимок» сэсэрлигэй даагша Анна Гущина хэлэнэ.
Алас Дурнын тойрогой тэдхэмжын хэмжээндэ эдеэ хоол шанаха газарай барилгада 23,5 сая түхэриг һомологдохо. Энэ мүнгөөр СанПиНай эрилтэнүүдтэ таараһан эдеэ хоол шанаха, хубсаһа угааха газар баригдаха юм.
Тиихэдэ Алас Дурнын тойрогой тэдхэмжын хэмжээндэ Маловский һууринай һургуулида тамирай танхим барилгада 45,5 сая түхэриг һомологдохо гэжэ түсэблэгдэнхэй. 2016 онһоо хойшо мүнөө байһан тамирай зал аюултай боложо, хэшээлнүүд үнгэргэгдэнэгүй. Энэ һургуулиин һурагшадай болон багшанарай хэлэһэнэй ёһоор, хэшээлнүүд һомоной тамирай байшанда үнгэрдэг юм.
Маловский һууринай һургуули 1978 ондо баригдажа, ехэ заһабарилга хэхээр болонхой. Тиимэһээ энэ һургуулида хушалта шэнэлхэ, заһабарилгын ажалнуудта 7,4 сая түхэриг һомологдохо. Маловский һууринай һургуулиин байгуулагдаһан сагһаа хойшо 6 мянганһаа дээшэ эндэ һуража гараһан байна. Мүнөө эндэ 175 үхибүүд һурана.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа, тэдэнэй 36-ниинь болбосоролой һалбарида хабаатай гэжэ һануулнабди.
Анна Огороднигой гэрэл зураг
