2006 ондо Буряад орондо үнгэрһэн “Алтаргана” нааданһаа эхилээд, мүнөө болотор барилдаанай торгон хибэс дээрээ солоо дуудуулжа ябаа буряад баатар хүбүүдэй илалтануудые анхаран ябанабди. Аяар арбан гурбан жэлэй урда мүнөөнэйхидэл дасан хиидүүдэй нааданууд элбэгжээгүй байгаа, Хамба лама Дамба Аюшеевэймнай гар ба дошхон зан барилдаанай юртэмсэ руу һаял хүрэжэ ябаа. Гэбэшье хүдөөгэй найрнуудаар үргэн үбсүүтэ баатар хүбүүдэймнай джинсэ үмдөөр гаража барилдадаг ушарнууд үсөөржэ байгаа. Манай олон тоото шанга хүбүүд тэрэ “Алтаргана” нааданай хибэс дээрэ ялас гэмэ илалтануудаараа, нулимса дуһаама нюрга шоройдолгонуудаараа олоной дура татаал һэн.
Баруун, зүүн гарайнгаа бүхэриг хургануудай үзүүртэ арһан шэхэ мушхажа адхаха шадалаа һорижо ябагша Цыбиг Максаров гү, али нюдэ сабшаха зуура баргажан булган мэтэ хүлдэ шургагша Михаил Дамбиев, бар хүсэн ба Сэлэнгэ талын һалхинай шуран хоёрые хабсаруулан номгоруулһан Зоригто Цырендондопов гү, али олон жэлдэ Хэжэнгын талаһаа хүндэ шэгнүүртэ бүхын түрөөгүйе дүүрэн хангаһан барилдааша Володя Дамдинов… Эдэ ба бусад олон һайхан бүхэшүүл мүнөө болотор солоо дуудуулхань соло дуудуулжа, хурдан хүлтэ эмнигүүдые һургахань уяашанай һайхан хуби заяа эдлэжэ, адууһа мал үдхэжэ, үхи хүүгэдые һорижо ябанад.
Бүхын дээрэ бүхэ байдаг
Харин тэрэ һайхан барилдаан соогуур олон юумэ мэдэхэгүй, буруугай бэлшээриһээ холо алхаагүй зоной шэхэндэ “бүхын дээрэ бүхэ байдаг даа” г.м. енгүүтэйхэн үгэнүүд дуулдажа, энэ үргэн үбсүүтэнииемнай хэн илаха гээшэб гэжэ гайхуулаа агша һэн. Агын талаһаа ерэһэн ахатанууд: ”Зуун жэлнүүдэй уулзуурай сэмүүн сагаар урагшалһан уладаймнай үри һадаһад Монголой Дорнод, Булган, Хэнтэйгээр үнэржэжэ, Халхын хүбшын хара баабгайнуудаар тулалдаха шадалтай болонхой ябана”, - гэлсэнхэй һэн. Харин тиихэдэ мүнөөнэйхидэл сүлжээн, утаһан г.м. хоморой байжа, хөөһэ бурьяма ябаган хөөрөөнһөө сааша һонирхолнай хүгжөөгүй даа.
Шэхээрээ дуулаһанһаа нюдөөрөө хараһаниинь...
Саг түргэн. Оройдоол хоёр жэлэй болзорой үнгэрөөд байхада, Эрхүүгэй “Алтарганада” Дорнодой түлөөлэгшэ, нагасата талаараа Ага найман эсэгын үри һадаһан Дондогой Цогзолдоржын уран барилдаа үзэжэ, үнэхөөр элинсэгэймнай хэлэндэ туугдажа, түмэн жэлдэ бөөмэйлэн ерэһэн “бүхын дээрэ бүхэ бии” гэһэн сэсэн мэргэн үгэ баталаабди. 2006 оной Монголой Ехэ нааданда “уласай нашан” солодо хүртэһэн Цогзолдоржо бүхэмнай Эрхүү дээрэ манай хүбүүдые шадамараар оройлоо даа. Сажан тухай үндэр бэетэй, балсан булшангаар хүлеэтэй мэтэ бэетэй, бүдүүн гуятай ба шэнэһэн бахананууд мэтэ хүдэр хүлтэй энэ барилдаашан нашанай сасагтай жанжан малгайтай, зодог шуудагтай ногоон хибэсэй эрмэгтэ харагдахадаа, олоной анхарал татаа һэн. Буряадай шүүгшэдэй хэдышье шадамараар жээрэбэй шэдиие тааруулаа һаань, нэгэтэшье сухарингүй, Агын, Баргажанай, Захааминай, Хэжэнгын, Эрхүүгэй мэхэтэй, хүсэтэй, уран ба уран бэшэшье барилдаатай тарган, туранхай хүбүүдыемнай дээрэ дээрэнь ябталаад гаража ошоо бэлэй. Эсэхэ гээшые мэдэхэгүй, иимэ һайхан барилдаатай хүбүүе яажа торгодог гээшэб гэһэн бодол толгоймни оёорто бүхөөр хадуугдан һуугаа һэн. Бүхэ барилдаанай юртэмсэнүүд түби түбидөө һайханаар, өөрсэ маягтайгаар хүгжэнэ даа.
Он жэлнүүдэй ошоһон хойно
Энэ һайхан бүхэтэеэ 11 жэлэй удаа Улаан-Баатарай түб талмай шадар оршодог шэнын түхэл янзатай һайхан “Хөвсгөл” буудалда урда долоон хоногто золгохо талаантай байгаабди. Носолдохоёо болиһоншье һаа, бэеэ һула табяагүй, халта маряажаашье һаа, тамирша тэнхээгээ алдаагүй Цогзолдоржо нашан олон һонин юумэ манда хөөрөө. Ерэхэ жэлэй “Алтарганада” Дорнодой залуу һүрэг асархаар найдуулна, өөрөө барилдахагүй байхаб даа гэнэ. “Табинай хорёодо орошоод, халтагар туранхай хүлтэй гаража, хүнэй энеэдэн болохо дурамгүй, - гэжэ миһэрээд, - Дорнодтомнай уласай солотой Доржын Анар гэжэ залуу бүхэ түрөө”, - гэжэ омогорхон нэмэбэ. Монгол дасгалжуулагшад ехэ олоороо Үбэр Монгол гаража ажаллана гэжэ хөөрэбэ. “Анхан монгол бүхэшүүл ябууд мүнгэ сохёод, барга монголшуудые ба манжанарые мушхаад ерэгшэ һэн. Мүнөө тиимэ юумэн дүүрэжэ байна. Жэлэй дүрбэн сагта залуу бүхэшүүл бэеэ һорино. Эдеэ хоол, байра һайтай, гүрэн түрын тэдхэмжэ эрхим - саг хубилаа. Харин Ородой буряадууд бүхэ барилдаагаа юундэ ехэ хүгжөөнэгүй гээшэб, - гэжэ шанална, - үншэн хэнзэ, ядуу яяр мэтэ хүл нюсэгөөр, янза бүриин түриитэй шоорто үмдэнхэй, харахада үзэмжэгүйхэнүүдээр гаража ерэнэ. Урданай сагта халхашье, буряадшье бүхэшүүл гутал хубсаһанай хоморто хүл нюсэгөөр гү, али уриһаар абажа үмдэжэ носолдодог һааб даа, теэд саг һайжараа, нэгэ гуримда гү, али зэмсэг хубсаһанда ерэхээр болообди. Үе мүсэдөө тааруулжа оёһон зодог шуудаг үмдэжэ барилдахада, ехэ хэсүү юумэниинь үгыл даа”, - гэжэ тобшолоо. Арсаха үгэ манда олдоогүй.
Улаан-Үдэ - Улаан-Баатар - Улаан-Үдэ
Tsogzoldorj Dondog facebook нюурһаа гэрэл зураг