1014
«Бага болон дунда олзын хэрэг эрхилэлгэ болон олзын хэрэг эрхилхэ үүсхэл дэмжэлгэ» гэһэн үндэһэтэнэй түсэлэй хэмжээндэ Буряад уласта гурбан жэлэй туршада 157,7 сая түхэриг федеральна һанһаа дамжуулагдаха. Тиихэдэ Алас Дурнын федеральна тойрогой 11 можо нютагта тэдхэмжэ үзүүлэгдэхэ. Ородой Холбоото Уласай Засагай газарай Түрүүлэгшэ Дмитрий Медведев энээн тухай захирмжа абаһан байна.
Федеральна һанһаа һомологдоһон мүнгөөр үндэһэтэнэй түсэл бэелүүлхэ можо нютагуудай программануудай гаргашануудта, «Агростартап» грантын хэмжээндэ хүдөө ажахынуудые байгуулха, хүгжөөхэ түсэлнүүдтэ, хүдөө нютагуудай кооперативуудай хүдөө ажахын техникэ, тоног хэрэгсэлнүүдые худалдажа абаһан гаргашануудай зарим хубииеньтүлэлгэдэ дамжуулагдаха.
- «Агростартап» болон кооперативуудые дэмжэхэ программануудай ашаар, 2019 ондо 17 хүдөө ажахы болон кооперативуудые байгуулха ёһотойбди. Үмсын ажахытай гэр бүлэнүүдые фермерскэ ажахы байгуулжа, гүрэнэй тэдхэмжэдэ хүртэхэ аргатай байхат гэжэ идхаха болонобди, - гэжэ Буряад Уласай хүдөө ажахын болон эдеэ хоолой сайдай орлогшо Юлия Дагданова хэлэбэ.
Эхэ хонидой, ямаануудай, мяханай үүлтэрэй адуу, малай тоо олошоруулгада байгша ондо Буряад Уласай хүдөө ажахын болон эдеэ хоолой яаман тэдхэмжэ шэглүүлээ. Һомологдоһон 22,8 сая түхэригэй ехэнхи хубинь 95 фермернүүдтэ дамжуулагдаа. Тиихэдэ хүдөө ажахы үйлэдбэрилэгшэдтэ һүнэй үүлтэрэй мал олошоруулгада 1,7 сая түхэриг һомологдоо.
