938
Хэжэнгэ аймагай “Хэжэнгын МТС” бүлгэм шэнэ техникэ абажа, байгша ондо 900 гектар талмайда орооһо таряа тариха түсэбтэй. Тиихэдэ энэ ажахы Тарбагатай аймагһаа “Бурятия-79” гэһэн сортын шэниисын хүрэнгэ худалдажа абаһан байха юм.
“Хэжэнгын МТС” бүлгэмэй захирал Тугэд Цыбикжаповай хэлэһээр, Боршогор гэжэ газарта 20 гектар талмайда, Ородой Адагта 100 гектар талмайда орооһо таригданхай. Тиихэдэ Загаһата шадар 600 гектар талмайда тарилгын ажал хэгдэхэ юм.
Үнгэрһэн жэлдэ энэ ажахыда гектар газарһаа 25 цетнер орооһо хуряаһан байна. Тэрэнээ наймаалжа, шэниисын хүрэнгэ болон шэнэ техникэ худалдажа абаа. “Кузбасс” гэһэн тарилгын комплекстой Ка-744 гэһэн хоёр трактор мүнөө поли дээрэ хүдэлнэ. Нэгэ зурууд татахадаа, тус техникэ гансата 5 ажал хэнэ. Тиихэдэ энэ ажахыда үшөө “Вектор” гэһэн хоёр комбайн болон хоёр анзаһа худалдажа абаһан байна.
