Һүүлэй үедэ буряад хэлэ үзэлгэдэ аргагүй ехэ анхарал хандуулагдажа байнхай. Бага наһанһаань һургаагүй һаа, түрэлхи хэлэеэ мэдэхэгүй хүнүүд урган үндыхэ болоно бшуу. Тиимэһээ хүүгэдэй сэсэрлигэй багшанар, хүмүүжүүлэгшэд ехэ хубитаяа энэ хэрэгтэ оруулна. Һаяхана Улаан-Үдэ хотын Стеклозавод һууринда оршодог “Малинка” гэһэн сэсэрлигтэ багашуул Элбэг Манзаровай баснинуудтай танилсаһан байна.
Буряад хэлэнэй багша Жаргалма Бадмаевна Майорова энэ хэмжээ ябуулгада үхибүүдэй түрэлхидыень болон хүндэтэ айлшадые уриһан байна.
Улаан-Үдын түбэй номой сангай 4-дэхи таһагай хүдэлмэрилэгшэ Наталья Юрьевна Гончарова сугларагшадта, илангаяа сэсэрлигэй хүүгэдтэ уран зохёолшо, дархан Элбэг Манзаров тухай тобшохоноор хөөрэжэ үгөө.
“Малинка” сэсэрлигэй бүхы бүлэгүүдэй тус хэмжээндэ хабаадаһаниинь һайшаалтай. Дунда болон аха бүлэгүүдэй хүбүүд, басагад Элбэг Манзаровай шүлэг болон басни сээжээр уншажа, айлшадые, түрэлхидөө баярлуулаа.
- Манай сэсэрлигтэ бэлигтэй үхибүүд хүмүүжүүлэгдэжэ байдаг. Советскэ хороогой “Эдир Баатар-Дангина-2019” урилдаанай үедэ 5-тай Настя Васильева уран һайханаар “Мал эмшэн - боргооһон” гэһэн басни хөөрэһэн. Энэл урилдаанда 6-тай Злата Костыгина хабаадаһан. Сэсэрлигэйнгээ хэдэн үхибүүдээр тэрэ “Борбилоо” гэһэн басни харуулаа һэн. Энэшье удаа эдэ хоёр басагаднай манайнгаа хэмжээе шэмэглээ, - гэжэ багша Жаргалма Бадмаевна хөөрэнэ.
Элбэг Манзаровай “Һайрхуу шаазгай”, “Шандаганай һургаал” гэһэн баснинууд, “Наран сэсэг”, “Дамбиин сэгнэлтэ”, “Заахан ябахадаа”, “Галаар наадаһан Ганжур” гэхэ мэтэ шүлэгүүдые сэсэрлигэй үхибүүд, 43- дахи һургуулиин шабинар хөөрэжэ харуулаа гээд хэлэхэ хэрэгтэй. Сэсэрлигэй шабинар Полина Глушкова, Намжилма Жанчикова, Никита Балуев, Ардан Пурбуев, Эрдэни Будажапов гэгшэдые тэмдэглэмээр.
- Иимэ хэмжээ үнгэргэхын түлөө Элбэг Содномович Манзаровай зохёохы ажал дэмы абаагүйб. Юуб гэхэдэ, тэрэ минии түрэһэн нютагай аха захатан болоно бшуу. Гэхэтэй хамта, ямаршье наһанай хүнүүдые һургахаар һонирхолтой баснинуудые бэшэһэн байна. “Жажалаагүй аад, бү залги, бодоогүй аад, бү хэлэ!” гэһэн мэргэн үгэнүүдые ходо һанажа ябаха хэрэгтэй гэһэн һургаал баснинууд үгэнэ ха юм, - гэжэ Жаргалма Майорова мэдүүлнэ.
Һонирхолтой хэмжээ ябуулгын үедэ дуунууд, хатарнууд олоор табигдажа, сугларагшадай нюдэнэй шэмэг, шэхэнэй хужар болоо гэбэл, алдуу болохогүй.
"Малинка" сэсэрлигэй гэрэл зураг