​​Бүмбэгэ үдьхэлөөд, бүгэдые булина

Түрүүшүүлэй тоодо ороһон басагад һоригшотоёо

Буряадай гүрэнэй ехэ һургуулиин футболист басагад “Мини-футбол болон вузууд” гэһэн бүхэроссиин түсэлдэ шалгарба. Тус мүрысөөнэй мүнгэн лигын 1-дэхи дивизиондо тэдэ шангай II һуурида гараа.

Бүхэроссиин түсэлэй Мүнгэн лигэ 2019 ондо анха түрүүшынхиеэ гурба боложо хубаараа. Тиимэһээ эндэ олон дээдэ һургуулинуудай команданууд хабаадаха аргатай болоо. Энэ лигын дээдэ дивизиондо 20 команда наадаа, мүн 1-дэхи дивизиондо 17 команда хабаадалсаа.

Бүлэгэй наадануудтаБГУ-гай басагад Саранск,Великий Новгород болонВолгоград хотонуудай командануудые илажа гараа. 2-дохи шатада һоригшо Андрей Атутовай шабинар Челябинск болон Великие Луки хотонуудай командануудые шүүгээ. Финалда Ульяновск хотын командада 3:6 гэһэн тоотойгоор шүүгдэжэ, шангай II һуури эзэлээ. Хэды тиигэбэшье 2019-2020 онуудай халаанда Буряадай гүрэнэй университедэй футболист басагад дээдэ дивизиондо наадаха эрхэдэ хүртөө.

Түрүү һууриин түлөө нааданда хабаадахабди гэжэ нэгэшье һанаагүй ябаһан Ородой бага футболой эблэлэй сайтда БГУ-гай командын капитан Александра Дондокова мэдүүлһэн байна.

- Түрүүн бидэнэй хүл гар ехэ һалганажа байгаа. Илалтануудые туйлажа эхилһээр, нэгэ бага айхаяа болёобди. Бүхэроссиин энэ түсэл бага футбол, илангаяа эхэнэрнүүдэй хабаадалгые тон ехээр дэмжэнэ гэжэ һананаб. Бидэндэл адли холо ажамидардаг команданууд иимэ томо мүрысөөндэ хабаадаха эрхэтэй болоһондонь баярланабди. Ондоо командануудые хаража, саашадаа хайшан гээд наадаяа табиха гээшэбибди гэжэ ехэ анхаралтайгаар мүрысөөнэй үедэ хараабди, - гэжэ Александра Дондокова хөөрэнэ.