​Ородой Холбоото Уласай Юрэнхылэгшын даалгабаринуудые бэелүүлхэ талаар зүблөөндэ Буряадай Толгойлогшо хабаадаба

Байгша оной майн 14-дэ Буряад Уласай Толгойлогшо Алексей Цыденов Дмитрий Медведевэй хүтэлбэри доро үнгэргэгдэһэн Ородой Холбоото Уласай Юрэнхылэгшын болон Засагай газарай даалгабаринуудые бэелүүлхэ талаар зүблөөндэ хабаадаһан байна.

Зүблөөндэ Ородой Холбоото Уласай Засагай газарай Түрүүлэгшын орлогшонууд, федеральна яаманууд болон эмхинүүдэй, можо нютагуудай хүтэлбэрилэгшэд хабаадаа. Ородой Холбоото Уласай Засагай газарай Түрүүлэгшэ Дмитрий Медведевэй хэлэһэнэй ёһоор, Юрэнхылэгшын болон Засагай газарай даалгабаринуудые беэлүүлхэ шухала.

- Ородой Холбоото Уласай Юрэнхылэгшэ болон Засагай газар шухала даалгабаринууд үгэһэн байна. Тэдэ зарим ушарта хүсэд бэелүүлэгдэнэгүй, - гэжэ Дмитрий Медведев тэмдэглэбэ.

Буряад Уласай Толгойлогшо Алексей Цыденов хүүгэдэй сэсэрлигүүдэй дутагдалай талаар хэгдэжэ байһан ажал тухай дуулгаба.

- Мүнөө улас дотор хүүгэдэй сэсэрлигүүдтэ орохо ээлжээндэ 3 наһатайһаа 7-той болотор 6 мянган хүн байна. Мүнгэ һомололго, дэмжэлгын түлөө Татьяна Голиковада баяр хүргэнэбди. Мүнөө 2000 мянга һууритай хүүгэдэй сэсэрлигүүдые барижа байнабди. 2020-2022 онуудта үшөө 2 мянган һуурита сэсэрлиг бариха талаар Гэгээрэлгын яамантай хамта ажал ябуулнабди, - гэжэ Алексей Цыденов хэлэбэ.

Бүхы можо нютагуудта хүүгэдэй сэсэрлигүүдтэ ээлжээ усадхаха хэрэгтэй гэжэ Ородой Холбоото Уласай Засагай газарай Түрүүлэгшэ тэмдэглэһэн байна.

- Можо нютагууд ганса өөһэдынгөө хүсөөр хүүгэдэй сэсэрлигүүдтэ орохо ээлжээ усадхажа шадахагүй. Тиимэһээ энэ асуудал шиидхэхын тула туһаламжа үзүүлхэ болонобди. Мүнгэн һангай яамантай хамта дурадхалнуудые оруулагты. Эдэ дурадхалнууд бодото дээрэнь бэелүүлхээр байха гэжэ найданаб, хүүгэдэй сэсэрлигтэ орохо ээлжээндэ арга мэхэ хэрэглэгдэхэгүй, - гэжэ Дмитрий Медведев онсолбо.

Буряад Уласта хүүгэдэй сэсэрлигүүдые барилгада «Демография» гэһэн үндэһэтэнэй түсэлэй хэмжээндэ Ородой Холбоото Уласай Юрэнхылэгшын «майн тогтоолнуудай», премьер-министр Дмитрий Медведевэй даалгабаряар эдэй засагай хүгжэлтын түбүүдэй ниигэмэй хүгждэлтын түсэбэй хэмжээндэ федеральна һанһаа мүнгэн һомологдоно. 

Анна Огороднигой гэрэл зураг