1118
Майн 23-да 15 сагта Үндэһэтэнэй номой санда Буряад арадай уран зохёолшо, публицист, «Байгал» сэтгүүлэй ахамад редактораар хүдэлһэн Африкан Андреевич Бальбуровай түрэһөөр 100 жэлэй ойн баярта зорюулһан үдэшэ үнгэргэгдэхэ.
Энэ үдэшэ «Байкал» сэтгүүлэй ахамад редактор Булат Аюшеев, сэтгүүлшэн Юрий Невский Африкан Бальбуровай зохёохы намтар тухайнь хөөрэхэ. Буряад арадай уран зохёолшод Ардан Ангархаев, Владимир Митыпов хэмжээ ябуулгада хабаадаха. Африкан Бальбуровай зохёохы үдэшэ номуудайнь үзэсхэлэн дэлгэгдэхэ.
1939 онһоо СССР-эй уран зохёолшодой холбооной гэшүүн, Буряад арадай уран зохёолшо, Буряадай АССР-эй Гүрэнэй шангай лауреат Африкан Андреевич Бальбуров 1919 оной майн 5-да Усть-Ордагай Буряадай тойрогой Алайрай аймагай Хурсанга нютагта түрэһэн юм. Тэрэ бага балшар наһанһаа хүдэлжэ эхилээ. Африкан Бальбуров 1941 онһоо 1943 он болотор Улаан Армида алба гаража, удаань эрдэм шэнжэлэгшын, сурбалжалагшын, уран зохёолшын ажал хээ һэн. 1961-1974 онуудта Африкан Бальбуров «Байгал» сэтгүүлэй ахамад редактораар хүдэлөө.
Прозаик Африкан Бальбуров табяад онуудаар аша үрэтэйгээр бэшэжэ эхилһэн юм. Тиигэжэ «Манай Зэргэтэдэ», «Манай Буряад орондо», «Сагаан һара» гэжэ новеллэ болон рассказуудай суглуулбаринууд, Данри Хилтухинтай хамта бэшэһэн «Амиды ябахые захирнаб!» гэжэ баримтата повесть, «Бидэ Байгалай саана ажаһуунабди» гэжэ публицистическэ повесть, «Чау-чау» гэжэ хүүгэдэй повесть хойно хойноһоонь хэблэгдэн гараа. 1962 ондо А. Бальбуров «Зэдэлээтэ зэбэнүүд» гэһэн романаа хэблэн гаргаһан байна.
Африкан Бальбуров үргэн ехэ Эхэ оронойнгоо можо нютагуудаар, олон гүрэнүүдээр аяншалһан юм. Тиигэжэ «Холо, ойрын нютагуудаар», «Хани нүхэсэл, жаргал тухай», «Арбан хоёр эрдэнимни» гэжэ номуудые бэшээ һэн.
Түбэй Азиин арадуудай түүхэ һайн мэдэдэг уран зохёолшон буряад болон монгол зохёолнуудые ород хэлэн дээрэ оршуулдаг байһан юм.
Буряадай мэдээжэ уран зохёолшо, публицист Африкан Бальбуров олон тоото шагналнуудтай.
Буряад Уласай соёлой яаманай мэдээсэлэй албанай гэрэл зураг
