913
Ой модо тариха бүхэроссиин үдэр Улаан-Үдын Орешковой нэрэмжэтэ парк боло Заудинскын лесхоздо модонууд таригдаа. Байгша оной хэмжээ ябуулгада олон хүн хабаадажа, нёдондонойхидо орходоо, модонуудые тариха талмайн хэмжээн ехэ болоһон байна гээд тэмдэглэлтэй.
- Түймэртэ абтаһан, сабшагдаһан модонуудай орондо сагдуулнуудые тариха гээшэ шухала хэрэг. Игорь Шутенковэй эмхидхэһэн «Зеленый город» гэһэн хүдэлөөниие бидэ дэмжэнэбди. Олоной хүсөөр ехэ юумэн бүтэдэг. Тиимэһээ мүнөөдэрэй хэмжээ ябуулгада хүн бүхэн хабаадаха аргатай, - гэжэ Алексей Цыденов хэлэһэн байна.
Уласай хүтэлбэрилэгшын хэлэһээр, зайн галай һужаанууд доогуур ургаһан, түймэр һэргылжэ модо унагааһан газарнуудһаа тариха модонууд асарагдаа.
Байгалай, Кикагай, Ивалгын, Заудинскын, Загарайн, Мухар-Шэбэрэй, Сэлэнгын, Верхне-Талецкын, Хандагатайн, Байгал шадарай ойн ажахынуудай болон ой ашаглагшадай бэлдэһэн модохонуудые Алексей Цыденов Улаан-Үдын захиргаанда дамжуулаа.
Бүхыдөө 10 мянганһаа дээшэ үлир, хуһан, уляаһан, шэнэһэн, хасуури, мойһон болон бусад модонууд тариха гэжэ бэлдэгдэһэн байна. Тиихэдэ Заудинскын ойн ажахыда 30 гектар талмайда нарһанай 120 мянганһаа дээшэ сагдуул таригдаа.
Буряад улас дотор ой модо тариха талаар хэмжээ ябуулганууд ноябриин 1 болотор үргэлжэлүүлэгдэхэ юм.
Буряад уласта ой модо тарилгада «Ой модо харууһалга» гэһэн федеральна түсэлэй хэмжээндэ 2019 ондо 48 саяһаа дээшэ мүнгэн һомологдоо. Тиигэжэ 27,2 мянган гектар талмайда модонууд таригдаха юм.
Буряад Уласай Засагай газарай мэдээсэлэй албанай гэрэл зураг
