998
Буряад уласта гурбан үдэрэй туршада уласай хүтэлбэрилэгшын шанда хүртэхэ XXIV урилдаанда Буряадай барилдаашад 8 медальда хүртэбэ. Улаан-Үдэдэ эмхидхэгдэһэн тамирай хэмжээ ябуулгада дэлхэйн 15 гүрэнүүдэй, Ородой Холбоото Уласай 11 можо нютагуудай 200-һаа дээшэ тамиршад хабаадаа.
Гурбан үдэрэй туршада Буряадай тамиршад табан - алтан, гурбан хүрэл медальнуудта хүртэһэн байна. Уласхоорондын урилдаанай һүүлшын үдэр уласаймнай барилдаашад дүрбэн медаль абажа шадаа. Тиихэдэ Александр Богомоев Евгений Жербаев хоёр алтан медальнуудта хүртөө.
61 кг хүрэтэр шэгнүүртэ Александр Богомоев дэлхэйн чемпион Туменбилег Тувшинтулгые илаһан байна. Евгений Жербаев 70 кг хүрэтэр шэгнүүртэ Мурад Нухкадиевые булижа шадаа.
Мүрысөөнэй хоёрдохи үдэр Даша Шарастепанов, Арсалан Будажапов, Вероника Чумикова гэгшэд нэгэдэхи һуури эзэлжэ, алтан медальнуудта хүртөө. Тамир Гармаев гурбадахи һуури эзэлээ.
Эхэнэрнүүдэй дунда барилдаанда Монголой тамиршад зургаанһаа табан алтан медальда хүртөө. Эрэшүүлэй дунда Буряадай бүхэшүүл дүрбэн алтан медаль абаа, Хитадай хоёр барилдаашад, Тыва, Хойто Осети-Алани, Кемерово, Красноярскын нэгэ-нэгэ тамиршан чемпионой нэрэ зэргэдэ хүртөө.
Уласхоорондын урилдаанай хаалгын баяр ёһололдо Буряад Уласай Толгойлогшо Алексей Цыденов Арадай Хуралай Түрүүлэгшэ Владимир Павлов гэгшэд шагналнуудые барюулаа.
Тиихэдэ «BAIKAL OPEN» мүрысөөнэй эрхим барилдаашанай нэрэ зэргэдэ Буряадай тамиршан Александр Богомоев хүртэһэн байна. Эрхим барилдаашанда Ородой Холбоото Уласай барилдаанай федерациин шан барюулагдаа.
Буряад Уласай спортын болон залуушуулай бодолгын талаар яаманай гэрэл зураг
