Байгша оной июниин 12-то, Ородой Холбоото Уласай үдэр, «Бурядай үхибүүд – Ородой Холбоото Уласай эрхэтэд!» гэһэн хэмжээ ябуулга улас дотор эмхидхэгдэхэ. Хэмжээ ябуулгада Буряад Уласай Толгойлогшо Алексей Цыденов, Буряад уластахи ахамад федеральна инспектор Сергей Ромахин гэгшэд уласай эрхим һурагшадта нюурай түрүүшын үнэмшэлгэнүүдые барюулха. Ород гүрэнэй эрхэтэнэй шухала данса һуралсалдаа, тамирай, эрдэм-шэнжэлэлгын, олониитын-соёлой һалбарида үндэр амжалта туйлаһан һурагшадта барюулагдаха.
«Ородой Холбоото Уласай эрхэтэнэй нюур гэршэлһэн үнэмшэлгэ ехэ удха шанартай гэжэ үхибүүд ойлгохо. Һурагшадай Эхэ орондоо дурлажа, үнэн сэхээр хандажа ябахадань, энэ үдэрэй ёһолол мартагдашагүй байха ха юм», - гэжэ Буряад уласай болбосоролой болон эрдэм ухаанай яаманда тэмдэглэнэ.
Ородой Холбоото уласай үдэр 1992 онһоо тэмдэглэгдэдэг. Жэл бүри энэ үдэр Ородой Холбоото Уласай Юрэнхылэгшэ гүрэнэй шагналнуудые барюулдаг юм. Гүрэн дотор июниин 12-то баярай хэмжээ ябуулганууд үнгэргэгдэдэг заншалтай.
Анна Огороднигой гэрэл зураг