Александр ба Наталья Бужигеевтэн 2000 ондо бүлэ зохёоходоо, олон хүүгэдтэй болохобди гэжэ хэлсэһэн байгаа. Тэрэ гэһээр 19 жэл үнгэржэ, найман хүүгэдтэй болонхой, табиһан түсэбөө бэелүүлээбди гэжэ хөөрэнэд.
- Өөһэдөө олон хүүгэдтэй гэр бүлэдэ үндыһэн хадаа олон аха дүүнэртэй байхада һайн гэжэ, бэе дээрээ ойлгонхойбди. Бидэ 3 басагадтайбди, 5 хүбүүдтэйбди. Эгээл ехэ басаган Евгениямнай мүнөө багшанарай колледж дүүргэжэ байна, тон бага Андрей хүбүүмнай 2015 ондо түрэһэн, - гэжэ эзэн эхэнэр хөөрэнэ.
Үхибүүн бүхэн тухайнь хөөрүүлжэ, энэ бүлын эгээл ехэ баялиг - үри хүүгэдынь гэжэ тобшолол хээб. Эсэгэнь үгэ дуугүй. Үхибүүдээрээ омогорхоно гэжэ эли. Эжынь нюдэд баярай галаар гэрэлтэнэ. Аба эжын жаргал - үхибүүдэй амжалта гүб даа.
Евгения һургуулида ходол эрхимээр һураһан, олониитын ажалда эдэбхитэйгээр хабаададаг байһан. Багшанарай колледж дүүргээд, саашаа дээдэ һургуулида сэхэ орохо түсэбтэй.
Лариса басаганиинь мүнөө жэл дунда һургуулияа амжалтатайгаар түгэсхэжэ, Эмшэдэй дээдэ һургуулида һураха түсэб урдаа эрид табинхай. Лариса хэшээлнүүдтээ бэрхэ байхаһаа гадуур, тамираар бэеэ һоридог, элдэб мүрысөөн болон урилдаануудта эдэбхитэйгээр хабаадажа, амжалта туйладаг.
Иван хүбүүниинь Боохоной хүдөө ажахын техникумдэ эрхимээр һурана, бэрхэ бүхэ барилдаашан болонхой. Семён хүбүүниинь эгэшэ аханарһаа дутахагүй һайнаар 9-дэхи ангида һурана. Владислав тамирта шуналтайшье һаа, тоо бодолгын талаар амжалтатай 7-дохи анги дүүргэжэ ябана. 5-дахида һурадаг Кира басаганиинь нютагайнгаа һургуулиин омогорхол, алишье талаар эрхимэй тоодо ябадаг юм. 3-дахида һурадаг Толя хүбүүн баһал тамирай шэглэлдэ угаа абьяастай. Эгээл багахан Андрей дуу дуулаха, хатарха ехэ дуратай юм.
- Бидэ үхибүүтэй болоходоо, тон ехээр баярлажа, хүлеэн угтан абаабди. Хүүгэдэйнгээ түрэһэн үдэрнүүдые тэмдэглэхэ заншал манай бүлэдэ тон нангин юм. Илангаяа Пасхын һайндэртэ үхибүүднай дуратай. Бултадаа зэргэлээд һуужа, үндэгэеэ үнгэтэ будагаар шэрдэдэгбди. Үхибүүдэйнгээ унтаанда тэрэ үндэгэнүүдые газаа хорёо соо нюудагбди. Үхибүүднай һэреэд, ехэл хүхюутэйнүүд үндэгэ бэдэрдэг, - гэжэ эжынь хөөрэнэ.
Сагаан һарын һайндэрые бүлөөрөө тэмдэглэдэг заншалтай юм. Энэ һайндэр буряад хэлэеэ шудалалгада туһалдаг. Буряад арадайнгаа заншалта байдал, эдеэн, хубсаһан тухай үхибүүдтээ ойлгуулжа, заажа байдаг юм. Арадай аман зохёол уншаха, сээжэлдэхэ гээд лэ, буряад хэлэндэ үхибүүдээ һургахые оролдодог байна. Аха захатанаа, түрэл гаралаа хүндэлхэ гэһэн заншал сахигдадаг. Иигэжэ ород, буряад үндэһэн заншалнуудые адли тэгшэ заажа, бусад арадта тэсэмгэй хандаса хүмүүжүүлэгдэхэл ёһотой.
- Үхибүүднай бэе бэедээ зөөлэнөөр, энхэргыгээр хандадаг. Энээн дээрэл хүн зонтой харилсаан үндэһэлдэг гүб даа. Гэр бүлын харилсаан нангин байха гэжэ ойлгоод, өөһэдынгөө байдалаа саашадаа зүб мүрөөр зохёохо бэзэ гэжэ найдадагбди, - гэжэ Наталья Олеговна тэмдэглэнэ.
Гэр бүлын үшөө нэгэ һайхан заншал гэхэдэ, ажалда дуратайгаар үхибүүдээ хүмүүжүүлнэ. Олон хүүгэдтэй айлай үхибүүд бэе бэеэ дууряаһаар, гэрэйнгээ ажалда бэрхэнүүд болодог ха юм даа. Ямар нэгэ үйлэ хэрэгүүдые бултыень гэрэл зурагта буулгажа хадагалдаг. Сүлөө сагтаа тэдэнээ хаража, дурсан хүхилдэдэг юм. Эдэ гэрэл зурагуудай нөөсэ саашадаа үри хүүгэдэйнь, аша зээнэрэйнь дурасхаал боложо үгэхэ бшуу.
Гэрэй эзэн Александр Николаевич “Коняева В.Е.” гэһэн үмсын ажахыда ажалладаг. Харин Наталья Олеговна Хохорск тосхоной захиргаанай социальна талаар мэргэжэлтэнээр хүдэлнэ. Хүдөө нютагта ажаһуудаг хадаа үхэр малаа, тахяа гахайгаа тэжээжэ, огородой эдеэ элбэгээр ургуулжа, ан-бунхан ажаһуудаг. Мүнөө сагта олон хүүгэдтэй энэ залуу бүлэ бүгэдэндэ жэшээ боломоор юм.
Гэр бүлын альбомһоо гэрэл зураг абтаба