​Хүхихэ сагнай хүрэжэ ерэхэнь гү?

Үнгэрһэн долоон хоногой эхиндэ мэдээжэ сэтгүүлшэн Батодалай Багдаевһаа элбэгээр постнуудые дэлгээһэн хүн үгы. Солонгосто үнгэрһэн хуралдаанһаа тэрэ саггүй сэхэ эфиртэ гаража, Буряадай түлөөлэгшэдэй алхам бүхэниие дуулгажа байгаа. Тэрэшэлэн һургуулинуудта болоһон һүүлшын хонхын жэнгирээн социальна холбоон соо сууряатаа. Гадна майн 26-да «Ниитэ нэгэн Росси» намай уридшалһан һунгалта зарлагдажа, дүнгүүдынь элирээд, илагшадые амаршалагшад олон болоо. Теэдшье удангүй Улаан-Үдын Захиргааниие толгойлхын тула һунгалтада улаантаниие ударидадаг Вячеслав Мархаев оролсохонь гэһэн мэдээсэл таража, олониитые хоёр тээшэнь хубааба. Сентябриин 8 болотор хүхюутэйл байха хабди.

ОЛОНОЙ АНХАРАЛ – СОЛОНГОС РУУ

Урда Солонгосто майн 21-22-ой үдэрнүүдтэ үнгэрһэн хуралдаанай дүнгүүд ехэ һайшаагдана. Илангаяа Сеул хотоһоо агаарай онгосоор сэхэ Буряадта хүргэхэ арга боломжо түхөөһэн хэлсээн юунһээшье үнэтэй. Нютагаймнай түлэг наһандаа ябаһан олохон зон тэндэ ажал хэнэ гээд мэдэнэбди. Тэдэнэй нэгэн – суута Батожабайн түрэлэй болодог сэтгүүлшэн, уран зохёолшо Болод Ширибазаров энэ хуралдаанай үнгэрһэн хойно социальна холбоондо бэеэ мэдүүлхэдээ, иигэжэ дуулгаба: «Солонгос ороноор дүрбэдэхи һараяа түгэншэлжэ ябанаб. Ерүүл зонтой хүдэлдэг албан һара бүри нэгэ удаа намда хонходоод, үлүү удаан айлшалһыемнай һануулдаг. Би тиихэдэнь түгэншэлһөөр зандааб. Минии энэ «ногоон забһарай» дүүрэтэр, наһанайм нүхэрэй тэсэмгэйгээр хүлеэн байһаниинь болоо. Заатагүй нютагаа бусахаб, бэшэ хайшаа ошохобиб даа. Энэ соёлжоһон гүрэндэ нам мэтын зайгуул зохёолшодтошье зохистой лэ. Би юу хэнэбиб? Бэшэнэб, хүн зоноор харилсанаб, заримдаа гуйраншан шэнгеэр гудамжадашье хонохо сагууд ерэнэ, теэдшье юушьеб хүлеэнэб. Гэбэшье иимэ зайгуул байдалда һураагүйл һаа, дээрэ!»

Болот Ширибазаров

Болодой гуурһан дороһоо Солонгостой хабаатай шэнэ зохёолнуудые уншахал байхабди. Нютагайнгаа хүбүүдээр харилсаһанаа заатагүй тунхаглахаб гэжэ постынгоо доро үгэ гараа һэн. Тэрэнииень баһал тэсэ ядан хүлеэхэбди. Зосоохи уйгаа гарган, шэнэ мэдэрэмжэ бэдэрэн ябаһан Болодһоо бэшэн мүнгэнэйл түлөө Урда Солонгос руу харгылаа ааб даа. Тиихэгүйнь тулада Буряадай Толгойлогшо Алексей Цыденов арга боломжонуудые бэдэрнэ гэхэдэ болоно. Солонгос руу зүг бариһаниинь иимэл шалтагтай. Уласхоорондын хэмжээнэй хуралдаа «АРД» гэжэ мэдээсэлэй интернет-сэтгүүлые байгуулагша Бато Очиров эмхидхээ. Тэрэ мүнөө Урда Солонгосой "РБК Гео групп" компаниие Россида түлөөлдэг болонхой. 

Ву Таенг Вонг, Батодалай Багдаев

Тус компанииин юрэнхы захирал Ву Таенг Вонг гэжэ олзын хэрэг эрхилэгшын Буряадта анхаралаа хандуулһаниинь, ехын аза талаан. Юундэб гэхэдэ, Улаан-Үдые Сибириин Сингапур болгохо тухай тэрэ бодоно гээд, Багдаев нүхэрнай турьяна. Харахал гүбди даа!

БАЯРАА БАГТААЖА ЯДАА ГҮ?

Гүрэнэймнай бүхы һургуулинуудта һүүлшын хонхо жэнгирбэ. Владивосток хотын 74-дэхи һургуули дүүргэгшэд хэтэрмэ үлүүгээр хүхилдэбэ. Тиигэжэ бүхы дэлхэйгээр суурхаа. Хүбүүдынь шандаган болообди гэжэ хахархай үмдэ углаа, хахад бэеэ нюсэгэлөө, басагадынь сагдаагай хубсаһаар ерээ. Һургаалгүй үхибүүд гэжэ социальна холбоондо тэдэниие шүүмжэлнэ. Бүхы Росси гүрэмнай «Дом-2» болоо гээдшье зарим нэгэн cухалдана. Зүрхэтэй үхибүүд гэжэ дэмжэгшэдшье бии. Теэдшье эдэнэй ааша ябадалай түлөө һургуулиин захирал харюусаба гээд удангүй олондо мэдээсэгдээ. Тиихэдэ баһа нэгэ һургуулиин захирал һургуулитаяа хахасабат гэхынгээ орондо ами наһантаяа хахасабат гэжэ үгэ алдаба. Тэрэнь баһал олоной дунда шууд тарашоо ааб даа.

Гэбэшье Буряадта иимэ гажа буруу ябадалнууд үзэгдөөгүй. Буряад Уласай Арадай Хуралай һунгамал Игорь Марковец, мэдээжэ дуушан Бадма-Ханда Аюшеева, байгаали хамгаалагша Наталья Тумуреева, Зүүн зүгэй эмнэлгын түбэй пресс-албан Оюна Ринчинова болон бусад һургуулияа түгэсхэжэ байһан үхибүүдэйнгээ дэргэдэ буулгаһан гэрэл зурагуудаа социальна холбоондо дэлгэбэ. Бэрхэ сэтгүүлшэн Станислав Белобородов лэ гэрэл зурагайнгаа доро иигэжэ дурсаба: «Басаганайнгаа һуури угаажа байһамни үсэгэлдэр мэтэ һанагдана. Харин мүнөөдэр - һүүлшынь хонхо».

«ТЭНГЭРИИН ОРДОН» НЭЭГДЭЖЭ

Комушка шадар оршодог «Тэнгэриин ордон» майн 26-да олоной хабаадалгатайгаар нээгдэбэ гэhэн мэдээсэл олон тоото гэрэл зурагуудтайгаар социальна холбоондо тараа. Нээлгын баяр ёһололдо мэдээжэ нюурнуудые анхарбабди. Хэд бэ гэхэдэ, ЛДПР-ые ударидадаг залуу һунгамал Сергей Дорош, мэдээжэ олзын хэрэг эрхилэгшэ Вадим Бредний, Буряадай гүрэнэй драматическа театрай уран һайханай хүтэлбэрилэгшэ Саян Жамбалов болон бусад. 13 хаашуулда зорюулһан энэ ордоной урда Буряадай оперо болон баледэй театрай орой дээрэхи хүлэг моридые унаһан хоёрой баримал байгуулагдаа. 10 жэлэй саана театр дээрэ аб адлихан аад, хүнгэн шэнэ хүшөө табигдаһан байна.

ҺУНГАЛТА ТУХАЙ ХЭДЭН ҮГЭ

Һунгалтын үедэ ехэ хүлгөөтэй болодог. Али нэгэнэй тала бари гэһэн идхалгын ажал ябуулагдажа эхилнэ. Тиигэжэ заримашуул ангиин дайсад мэтэ болоод, бэе бэетэеэ мэндэшэлсэхэеэ болидог юм. Һунгалтаһаа боложо, зарим айл бүлэнүүдшье һалашадаг гэжэ нэгэнэй хэлэһые хадуужа абаа бэлэйб. Иигэжэл зоноо хубаажа зонхилхо гэдэгнай гаража ерэнэ гү? Теэдшье һунгалтагүйгөөр ажабайдалнай борохон мэтээр һанагдаха һэн ха. Майн 26-да “Ниитэ нэгэн Росси” намай уридшалһан һунгалта үнгэржэ, дүнгүүдынь элирбэ. Улаан-Үдын тойрогуудта 70 хуби илагшадынь – шэнэ нюурнууд.

Гэбэшье зулгы һайхан зумнай хүлгөөтэйхэн, хүхюутэйхэн байхаар хүлеэгдэнэ.

Вячеслав Мархаев

Вячеслав Мархаев Улаан-Үдын Захиргааниие толгойлхын тулада һунгалтада оролсохонь гү гэжэ олоной маргаһаар байтар, тон хабаадаха тухайнь тодо болобо. Тиимэһээ шангахан тулалдаан болохонь ха.