​Дура татаһан орьёлнууд

Баргажанай Альпанууд гэжэ суурхаһан саһа ехэтэ хадануудаар майн 23-26-ай үдэрнүүдтэ 11 хүнһөө бүридэһэн бүлэг ябабабди. Эрхүү, Шэтэ, Красноярск, Улаан-Үдэ хотонуудай хабаадагшадые Буряад Уласай Аюултай тамирай янзануудай федерациин дарга Сергей Климов ударидаа.

Баргажанай хадануудаар ябахада, зайнь тиимэшье ута бэшэ, оройдоол 18 модо тухай. Тэрэниие 3-4 үдэрэй туршада гаталхаар. Баргажанай Альпануудта хүрэхэ гэбэл, Яаригта тосхонһоо 3,5 модоной зайда ой соогуур ябажа, Үлзы голой гарасада хүрэхэт. Тэрээнһээ саашаа 6,5 модоной зайда ябаһанай удаа лагерьта тулажа ерэхэт. Эдэ хаданууд альпинистнүүд болон аюултай тамирай янзануудта дуратайшуулай дура буляанхай. Баргажанай хадануудай Варяг, Аргата, Гигант гэһэн орьёлнууд олондо мэдээжэ. Дүй дүршэл ехэтэй аяншалагшад лэ эдэ хадануудые үгсэн гарадаг. Тиихэдэ Байгал далайһаа холо бэшэ, Баргажанай дабаанһаа урдадаг Үлзы гол аяншалагшадай һонирхол татадаг юм.

Хадаһаа һолжорхо хаһа түгэсхэхэ зорилготой бидэнэр орьёл өөдэ тэгүүлээбди. Үндэр уулада наранай орохо сагта хүрэжэ ерэхэдэмнай, саһа, бороо, шуурган һалхин угтаһаар лэ абаа. Гүнзэгы, метр шахуу үндэртэй саһа махажа, дулаахан гэртэ сугларбабди.

Мүнөө жэл Үлзы гол шадар саһан ехэ, тиимэһээ гэрэйнгээ хэрэлсыһээ холо ошонгүй, хадаһаа һолжорхоор байгаа. Саһан дээгүүр ябаха хэрэгсэл гуталдаа үмдэжэ, Гигант гэһэн мэдээжэ орьёл хүрэтэр түрүүшынгээ үдэр хада уулатай танилсангаа гараха гэжэ шиидээбди.

Хадаһаа һолжорхо гэжэ зориһон хадаа хоёрдохи үдэртэнь Новосибирскын аяншалагшадай клубай дабаан, Сластинай хотогор (впадина), Узел хада хүрэтэр дабшаабди. Эдэ нэрлэгдэһэн газарнуудта хадын санаар һолжорогшодой гэрэл зураг буулгааб. Одоошье наратай, дулаан үдэр байжа, ехэхэн ажал хэгдээ.