994
2019 ондо Буряад уласта Алас Дурнын тойрогой хэмжээндэ уласай болбосоролой һалбарида 1,4 миллиарад түхэриг һомологдоо. Тиигэжэ Сэлэнгэ аймагай Новоселенгинск һууринда 176 һууритай һургуулиин барилга байгша ондо эхилхэ. Тэрэнэй барилгада 313 саяһаа дээшэ түхэриг хараалагданхай.
2020 ондо шэнэ һургуули ашаглалгада тушаагдажа, эрэмдэг бэетэй үхибүүд һаадгүй оршондо һураха аргатай болохо.
- Шэнэ һургуулида пандус, лифт, үргэн коридор хэгдэхэ юм. Тиихэдэ хараа муутай үхибүүдтэ мэдээсэл абаха тусхай хэрэгсэлнүүд байха, - гэжэ Новоселенгинскын дунда һургуулиин захирал Анна Круглова хэлэбэ.
Мүнөө энэ һууринай 132 үхибүүд аюултай болоһон 4 байшанда һуралсал гарана. Хоёр дабхар һургуулиин түрүүшын байшан 1955 ондо баригдаһан юм. Нэгэ дабхартай хоёрдохи байшаниинь 1959 ондо баригданхай.
- Һурагшадай һуралсалай-хүмүүжүүлгын программада шэнэ юумэ нэбтэрүүлхэ гэбэл, мүнөө үеын болбосоролой эрилтэнүүдтэ таараһан байшан хэрэгтэй, - гэжэ һургуулиин захирал тэмдэглэбэ.
Тэрэшэлэн Алас Дурнын тойрогой тэдхэмжын хэмжээндэ Сэлэнгэ аймагта болбосоролой 5 эмхи заһабарилагдаха юм. Тэрэ тоодо, 1977 ондо баригдаһан Гусиноозёрскын элшэ хүсэнэй техникумдэ заһабарилгын ажалнууд хэгдэхэ. Энэ байшанай танхимууд шэнээр хэгдэжэ, WorldSkillsRussia гэһэн хэмжээ ябуулгын эрилтэнүүдтэ тааруу болгогдохо юм.
Энээнһээ гадна нэмэлтэ һуралсалай «Сэлэнгэ» түб заһабарилагдаха. 1,7 мянганһаа дээшэ үхибүүдэй ябадаг байшан 1972 ондо баригдаһан хүүгэдэй сэсэрлигтэ байрланхай. Тэрэнэй заһабарилгада 19 саяһаа дээшэ шэглүүлэгдэхэ гэжэ түсэблэгдэнхэй. Тэрэ тоодо, залуушуулай «Селенга» байшан заһабарилгада – 3,2 сая, «Сказка» гэһэн хүүгэдэй сэсэрлигтэ – 20 сая, «Солнышко» сэсэрлигтэ 11,6 сая түхэриг дамжуулагдаха юм.
Ородой Холбоото Уласай Юрэнхылэгшэ Владимир Путинай ноябриин 3-да абтаһан Тогтоолой ёһоор Буряад Улас Алас Дурнын федеральна тойрогто оруулагдаа гэжэ һануулнабди. Тиимэһээ Буряад Уласай хүгжэлтэдэ Алас Дурнын тэдхэмжэ үзүүлэгдэнэ. Ородой Холбоото Уласай Засагай газарай Түрүүлэгшын орлогшо – Алас Дурнын федеральна тойрогто Ородой Холбоото Уласай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри доро ажаллаһан комисси мартын 14-дэ Буряад уласай эдэй засагай хүгжэлтын түбүүдэй ниигэмэй түсэб дэмжэһэн байна. Энэ түсэбтэ 6 миллиард түхэригэй 73 хэмжээ ябуулга оруулагдаа гэжэ һануулнабди.
Буряад Уласай Засагай газарай мэдээсэлэй албанай гэрэл зураг
