944
Байгша оной июлиин 9-дэ «Кяхта» гэһэн автоунаануудай пункта уласхоорондын «Шелковый путь – 2019» гэһэн раллида хабаадагшад хилэ гараха юм. Тиимэһээ энэ үдэр Буряад уласай ажаһуугшадые хүршэ гүрэн гарахыень һэргылнэ.
«Шелковый путь – 2019» гэһэн уласхоорондын хэмжээ ябуулга июлиин 6-да эхилхэ юм. Раллида хабаадагшад Эрхүү хотоһоо гаража, июлиин 16-да Хитадай Дунхуань хүрэхэ. Уласхоорондын урилдаанда дэлхэйн 40 гүрэнүүдэй түлөөлэгшэд 400 тухай автоунаануудаар хабаадаха гэжэ хараалагданхай.
Байгша оной уласхоорондын хэмжээ ябуулгада анха түрүүшынхиеэ Монгол гүрэн хабаадана. Урилданаанай хоёрдохи шатада жолоошод Эрхүү можын Байкальск хотоһоо Буряад, Монгол уласуудай хилэ хүрэхэ юм. Буряад уласта урилдаашад июлиин 9 болотор байха. Удаань июлиин 9-дэ тэдэнэр Монгол руу тэгүүлхэ. Тиигэжэ «Кяхта» гэһэн автоунаануудай хилэ гараха пункта 400-гаад машинанууд нэгэ доро хилэ гараха юм. Энэ пунктда үдэрэй туршада 1000 автоунаанууд гараха аргатай. Тиимэһээ июлиин 9-дэ хилэ сахигшадта ажал нэмэгдэхэ. Буряад уласай ажаһуугшад өөһэдынгөө саг алмажа, Монгол ондоо үдэр гарахаар түсэблэбэлнь дээрэ байха.
Ородой Холбоото Уласай Засагай газарай захирамжаар жэл бүри эмхидхэгдэдэг «Шелковый путь» гэһэн уласхоорондын урилдаанай Ород гүрэнэй шата бэелүүлэгдэнэ.
