Ирагуу найрагшын «Газелеокая» гэжэ шүлэгэйнь нэрээр нэрлэгдэһэн ханын үргэлжэ ехэ зураг июниин 11-дэ – Намжил Нимбуевай түрэһэн үдэртэ нээгдээ. Тэрэ Ленинэй гудамжын 63-дахи гэрэй ба Арадай Хуралай байшангай хоорондохи хана дээрэ зураатай. Иимэ маягаар бүтээгдэһэн зураг ниислэл хотодо хаанашье үгы юм.
- Манай хотодо стрит-артын (гудамжын зурагай) шанар дээшэлүүлхэеэ һанаа хүм. Минии һанамжаар, зориһондоо хүрэжэ шадааб, - гэжэ зурагай автор Артём Маганов хэлээ.
Артём Маганов
Һайндэртэ хабаадаһан Улаан-Үдэ хотын Захиргаанай хүтэлбэрилэгшын уялгануудые дүүргэгшэ Игорь Шутенков эндэ зураглагдаһан шүлэгыень ирагуу гоёор уншажа үгөө. Гадна Залуушуулай театр “Намжил Нимбуев. Стихи” гэһэн зүжэгэй хэһэг харуулаа.
Намжил Нимбуевай гудамжада хабаатай түсэл энээгээр дүүрэшэхэ бэшэ гэжэ һануулая.
- Манай түсэл гурбан ехэ хубиһаа бүридэнэ. Түрүүшын ханые бидэ ирагуу найрагшын дүрэ зурагаар шэмэглээд, хүн зоной сайтда орожо, Намжил Нимбуевай зохёолнуудтайнь танилсажа байхын тула тэндэнь QR-код тодхообди. Хоёрдохи үргэлжэ зурагынь хадаа орёо бүтээл болоно. Саашадаа Главпочтамтын хана дээрэ ажалаа үргэлжэлүүлхэбди. Тэндэнь хэдэн шүлэг зурагуудтаяа үгтэхэ. Тиихэлээрээ “Утренний намаз” гэһэн шүлэгыень ород ба буряад хэлэн дээрэ уран зураашан Зоригто Доржиев шэмэглэхэ юм. Удаань Уралигай колледжын оюутад хубитаяа оруулалсаха, - гэжэ энэ түсэл үүсхэгшэ, “Байкал Медиа” компаниин юрэнхы захирал Сергей Бурдиков хэлээ. – Нэгэ шүлэгыень англи хэлэн дээрэшье үгэжэ болохобди. Ниислэл хотымнай айлшадта һонин байха ха юм. Главпочтамтын ба Ленинэй гудамжын 63-дахи гэрэй хоорондохи гудамжа энээнһээ урид ходо гунигтай шэнги, муухай байгша һэн. Харин мүнөө һаруул гоё болохо.
Сергей Бурдиковай мэдээсэһээр, уран шүлэгшэдэй мүрысөөн дахин үнгэргэгдэхэ. Гол шангынь – суута Даша Намдаковой бүтээһэн “Аистёнок” гэһэн статуэткэ. Энэ мүрысөөн гурба дахин үнгэргэгдөө һэн. Эртээнһээ бэшэ, тэрэ дороо шүлэг зохёохо хэрэгтэй. Жюриин гэшүүд ямар нэгэн сэдэб, Намжил Нимбуевай богонихон шүлэг жэшээ болгон дурадхахадань, хабаадагшад 10 минутын туршада ирагуу найрагшын маягаар шүлэг зохёохо ёһотой. Түгэсхэлдөө дуугаа үгэлгын дүнгүүдээр илагша тодоруулагдаха юм.
Анна Огороднигой гэрэл зурагууд