Улаан-Үдэдэ амитадай түрүүшын дэлгүүр июниин 8-да хүдэлжэ эхилбэ.
Амитадай тусхай дэлгүүр байгуулха асуудал энэ болотор шиидхэгдээгүй байгаа. Тиимэһээ хотын дэлгүүр бүхэндэ шубуу шонхор, гэрэй ба зэрлиг амитадые наймаалагшад нэгэ булан эзэлдэг һэн. Эрилтын ёһоор, хүдөөгэй, гэрэй амитадые тусхай дэлгүүртэ наймаалха гурим хадаа халдабарита үбшэнүүдһээ һэргылхэ зорилготой. Наймаашад хотын захиргаанда хандажа, хуулита газар эриһэн байгаа. Тиигэжэ “Крестьянский” дэлгүүр дээрэ майн 1-һээ барилгын ажал эхилжэ, 21 үдэрэй туршада дэлгүүр бүтэшэбэ.
Бүхыдөө энэ хэрэгтэ 700 мянган түхэриг гаргашалагдаа. Амитадай болон наймаашадай һуури байра түхеэрэгдэнхэй. Эндэл тэжээл наймаалагдана, мүн малай аргашанай таһаг байгуулагдаа. Амитадай дэлгүүр наймаанай 30 һууритай, хамта дээрээ 500 дүрбэлжэн метр зайтай. Энэнь Буряад Уласай ветеринарна албанай эрилтэдэ таарама талмай боложо үгөө.
Гэхэ зуура, амитадай дэлгүүр наймаанай өөрын хаһатай байдаг. Тиимэһээ энэ дэлгүүр дээрэ үбэлдөө мяха, хабартаа тариха модохонуудые худалдадаг болохо. Эндэ ганса шубууд бэшэ, мүн гахай, туулай болон бусад хүдөө ажахын гэрэй амитад наймаалагдаха юм. Буряадай тоо баримтын албанай мэдээгээр, уласай бүхы хүдөө ажахынуудта 385 толгой хүдөө ажахын амитад бүридхэгдэнхэй, тэдэнэй 8 мянга 900-иинь шубууд болоно.
Анна ОГОРОДНИГОЙ гэрэл зураг