Ажабайдал үргэлжэлһөөр. Гэбэшье социальна холбоон соо гэрэл зурагууд хойно-хойноһоо һэлгэгдэн, алибаа нэгэнэй ажабайдалые гү, һанаа үнөөн болоһыень түүхэдэ оруулна. Хубиингаа хуудаһа үргэлжэ шэнэлжэ байдаг зон олошоржол байна. Тиихэдээ Интернедэй нүлөөн ехэл даа.
Хуухан амһарта хориё!
Буряад Уласай Толгойлогшын эдэй засагай талаар зүблэгшэ Алдар Бадмаев хуухан амһарта хэрэглэхые хориһон федеральна хуули баталагдаха гэжэ мэдээсэбэ. Дээрэһээ захиралта хүлеэнгүйгөөр, можо нютагай хэмжээндэ энээниие эрхилжэ боломоор бэшэ юм гү гэһэн һанамжанууд доронь хэлэгдэбэ. Үнэхөөрөөшье, һүүлэй байдалаар хуухан амһарта целлофан хоёр байгаалида ехэ гэгшын хохидол асарна. Энэ асуудалые Буряадай олониитэ үргэлжэ бодхоожо байбалнь, зүйтэйл һэн.
Иисэнгын жэшээ
Сэлэнгэ аймагай Асын дасанай жэшээе Улаан-Үдэһөө эхилээд, бусад нютаг һууринууд халан абаа гэхэдэ, алдуу болохогүй. Илангаяа һаяхана Иисэнгын ажаһуугшад Жигжитдоржо Будаев сомон дарга түрүүтэй аяар 2 мянгаад нарһан модо Баян Хонгорто һуулгаба. Тиигэһэнэйнгээ удаа Михайловка гэжэ газарые бог шоройһоо сүлөөлбэ. Энэ хэрэг баһал лама санаартанай үүсхэлээр болоо. Еши-Рабжин ламбагай бултаниие иимэ буянта хэрэг хэхыень уряалһан байна.
Баяртай гээгүй байтар
Буряадай баледые 2012 онһоо ударидаһан Морихиро Иватые олониитэ ажалһаань үдэшэжэ байна. Гайхалтайнь гэхэдэ, ябахамни гэжэ дуулгаагүй байтарнь, социальна холбоон соо шаналһан удхатай комментнүүд бэшэгдэжэ эхилээ. Буряадай гүрэнэй оперо болон баледэй театрай захиралай тушаалые ехэ хүлгөөтэйгөөр сүлөөлһэн Аюна Цыбикдоржиевагай бэшэһээр, Морихиро Иватые уригшад олон байгаа.
«Үшөө 5 жэлэй саана ондоо тээшээ ябахаяа һанахадань, баалахын хүсөөр байлгаа һэм», – гэжэ тэрэ дуулгана.
Теэдшье Морихиро ябангаа ябашаха бэшэ, саашадаа зүжэг найруулгада хабаадалсажа байха юм ха.
Бусаба
Нэгэеэ үдэшэжэ байтар, нүгөөдэеэ угтаха ушарнууд олон даа. Жэшээнь, мэдээжэ сэтгүүлшэн Елена Ширибоной хүбүүниинь сэрэгэй албанһаа табигдаба. Энэ ушараар сэдьхэл хүдэлгэмэ иимэ пост тунхаглаба:
«Бүтэн жэл хойномнай - сэрэгшын гуталтай, эжынь һанаагаа зобонхой. Эсэгэ оронойнгоо урда уялгаяа үгэбэбди! Семашкын нэрэмжэтэ РКБ-гэй таһагые ударидажа байгаад, ехээр хүсэбэл, хүбүүгээ албанһаань алад гаргуулжа боломоор байгаа аабза. Нюунагүйб – эмшэнтэй хөөрэлдөө һэм. Тиихэдээ үгэ бүхэнөө арай шамай үгүүлээб, аягүй байгаа. «Өөрөө шиидхэ – эдэ эмшэдэй дугаарнууд, хэлсэ», - гээ бэлэйб. Һүүлэй һүүлдэ сэрэгэй албанда ябаха гэжэ тэрэмни бодоо. Каштагта хахад жэл шэнээн санинструктор ябаа, Примориин хизаарай Боевойдо алба гараа. Тиихэдэнь маани уншажа, унтангүй үнгэргэһэн һүнинүүд байгаа. Далайн дэргэдэ ханяада хамшаг боложо зобоогоо. Хроническа түхэл абажа болохо ха юм. Командирта, генералда, үндэр тушаалтай найза нүхэдтөө, Путиндашье бэшэхээр бэлэн болоод ябааб. Сэрэгэй албан гээшэмнай парадна хубсаһан, романтика бэшэл даа. Офицернүүдэй хоол баридаг газарта хоёр үдэр хүдэлһэн байна. Тэндэ хэгдэһэн гэрэл зурагыень дэлгэнэм. Бусад үдэрнүүдтэ сэрэгшэдые ходо амтан хоолоор баясуулжа ябаа... Теэдшье гүбюулээгүй бэшэ, гүбюулээл аабза. Тэрээнгүй байхагүй. Сэрэгэй албан руу ябуулагты гэжэ зүбшэл үгэхэ аргамгүй. Хүн бүхэн өөрөө шиидэнэ... Мүнөөдэр сэдьхэлни дүүрэн, хүбүүмни сэрэгэй албанhаа ерэбэл даа. Ута наhатай, удаан жаргалтай ябыш даа! Бүхы эжынэрэй хүбүүд дорюун, бэрхэ ябаг лэ даа!»
Сэрэгэй албанhаа бусаа.
Нүүдэл байдалаа алдаагүй
Анжелика Дымчикова Фейсбук холбоондо иигэжэ дуулгаба:
«Яруунымнай Үльдэргын нүүдэлшэд үхэрөө туугаад, Түрхэлэй үдэсэтэй, ногоотой газар руу 3 үдэрэй туршада зөөжэ ябана. Эды хугасаада үшөө hайн ябаа һаа, хүрэхэ юм. Эдэ гурбан үдэр соо 160-аад модо гаталхань гээшэ. Нялха тугалнуудынь ябажа байтараа эсээд, дүрбэн шүшэгэр хүлөө эбхээд, хэбтэшэнэ. «Хоёр тугал трактор дээрэ тээгээбди, урагшаа ябахаяа болёо», - гэжэ малшан хэлэнэ. Арбадахи hара тээшэ эдэмнай hөөргөө бусахабди гэжэ манда дуулгаад, саашаа ябаба. Буряадуудаа хараад, сэдьхэл соо гүнзэгы мэдэрэл түрэбэ - түргэн энэ үеын забhар соо урданаймнай бардам, уртын дуун шэнги уужам, аажам, буряад-монголойм ажабайдал, зан абари харагдаба...»
Үзэсхэлэнһөө
Социальна холбоон соо Намжил Мардваев хүдөө ажахытай хабаатай постнуудые үргэлжэ толилжо байдаг. Улаан-Үдэдэ үнгэрһэн үүлтэртэ малай үзэсхэлэнһөө тобир тарган «сумоист» хонидой гэрэл зурагуудые тунхаглажа байгаа. Гадна үзэсхэлэнэй һая эхилээд байхадань, хэн илагша болохоб гэжэ өөрынгөө һанамжа бэшээ. Тиихэдээ тон зүб бодоһон байнал даа.
«Үльгэрэй» амжалта
«Үльгэр» театр Красноярск хотодо фестивальда хабаадажа байна гээд, урдахи дугаартаа дуулгаа бэлэйбди. «Сибирь. Терра Магика» гэжэ анха удаа болоһон можо нютагууд хоорондын энэ фестивальда театр «Алтан баг» абаагүй «Руслан ба Людмила» гэжэ зүжэгөө дурадхаа. Тиигэжэ «Томошуулда зорюулһан зүжэг» гэжэ номинацида лауреадай нэрэ зэргэдэ хүртэбэ.
«Үльгэр» театрайхидые урдань үшөө нэгэ ехэ ажал хүлеэнэ. Байгалай эрьедэ августын 5-һаа 15 болотор залуу халааниие суглуулжа, тусхай һургуули гаргаха юм. 9-дэхи анги түгэсхэһэн буряад хэлэтэй үхибүүд тиишэ ошохо аргатай. Ямаршье түлбэри хэрэггүй!