Захаамин аймагай үндэр наһатан үльгэр жэшээ боломо ажал ябуулгаараа мэдээжэ болонхой. Аяншалгада гарана, номуудые хэблэнэ, дүхэриг шэрээ үүсхэнэ. Түрэл аймагайнгаа 90 жэлэй ойдо зорюулжа, 90 наһандаа ербэгэр эрдэмтэн Б.Ш. Доржиев, 80-ай дабаан өөдэ наяржа ябаһан багшанар, эрдэмтэд Б.Г. Базарова, О.А. Батуева, Д.Ц. Бальжанов, Н.Ю. Банзаракшеев, Р.П. Дымбрылова, Д.Г. Чимитова Улаан-Үдэ - Захаамин гэһэн маршрудаар патриотис-хүмүүжүүлгын удхатай авто- ябаган аяншалгада ябажа ерээ һэн.
Мүнөө энэ бүлэг зон Монгол ороноор аяншалгада мордохоор бэеэ зэһэжэ, бэлдэжэ байнхай. Хүтэлбэрилэгшэнь – эдэндээ орходоо, “залуубтар” арадай уран дархан В.Д. Цыбиков мүн.
Эдэ зүтгэлтэн гар хооһон ябахагүй, өөр өөрын бэлэгүүдтэй юм. Жэшээлбэл, Валерий Цыбиков шүлэгүүдэйнгээ “Зүүдэнэй орон” гэһэн шэнэ номтой монгол нүхэдөө танилсуулха.
Ород Уласай гэгээрэлэй отличник, Ород Уласай габьяата багша Бадма Гомбоевна Базарова “Хужарайм юртэмсэ үеһөө үедэ” гэһэн барюубшатай, баримтаар баян номоо һая хэблүүлэн гаргуулба. Өөрөө Нурта нютагта түрэһэн, Хужарта һураһан намтартай юм.
- Юрэнхыдөө, хүн гээшэ наһан соогоо бэедээ нөөсэлһэнөө зондоо һөөргэнь тараажа үгэхэ, ондоогоор хэлэбэл, үриеэ түлэхэ ёһотой гээд һанагшаб. Дайнда хабаадагшадаа, ара талада ажаллаһан, нютагайнгаа омогорхол болоһон зоноо, үндэр наһатанаа, Эхэ-Геройнуудаа, обоо уулаяа, мүргэл шүтээнээ, угайнгаа залгаае, һонирхолтой ушаралнуудые – али алинииень алдангүй согсолхые оролдооб. Намдаа гар үзүүрэй туһаламжа үзүүлэгшэд - мүн лэ 80 гаран наһатай Ханда Банзаракцаевна Дамбаевада, Дора Зуйконовна Цыреновада баярые хүргэнэб, - гээд, Бадма Гомбоевнагай хөөрэхэдэнь:
Бадма Базарова
- Захаамин басагад, шангал байнат. Сэдьхэлэй сэсэг ургуулжа, хужарайхидаа хужарлуулбат, - гээд амаршалбаб.
- Үшөө нэгэ ном гаргаха хүсэлтэйб. Хилэ шэнээр тогтооходо, Монголдо, Тэшэг сомондо үлэшэһэн Нуртын 80-яад хүнэй нэрэ мэдээжэ юм. Эльгэн нютагаа эрьежэ хараха золгүй бурхандаа мордоһон үбгэд, хүгшэдэй дурасхаалые мүнхэлэн, мүнөө үеынь үри һадаһадта һануулга болгон зорюулхам. Жэшээлбэл, Баантиин Башлиин Балданай Гомбожаб Монголдоо 8 хүбүүтэй болоһон байна. Балдан Гомбожаб хоёр хамалганда орожо алуулһан. Үри үхибүүдынь мүнөө хуу дээдэ эрдэмтэй. Иимэ айлнууд олон, - гээд, габьяата багша онсолон дурсаба.
Ямар һайхан, дэмбэрэлтэй зорилго гээшэб. Хайрата нютагай халуун эльгэ тухай шэнэ энэ үүсхэлынь шууд бэелэг лэ гээд, Бадма Гомбоевнадаа доро дохиё.