Энэ удаа баһал зэрлиг амитан тухай хөөрэхэм. Монгол туургата арадуудай ехэ дээрэ морин-эрдэни гэжэ үргэн шүтэдэг амитан хэзээ заяанай үдхэгдэдэг табан хушуу малай нэгэн болонхой гэхэдэ, мүнөөшье зэрлиг адуун ушардаг.
Монгол ороноор нэгэтэ аяншалхадаа, олоной һонирхол түрүүлдэг зэрлиг адуунай амидардаг талада тудажа, тэдэнэй гэрэл зурагые буулгаа һэмби.
Пржевальскиин морин газар дэлхэйе хушаһан мүльһэтэ үеые дабажа гараһан амитадай нэгэн гэжэ тоологдодог. Эдэ морид шүрбэһэтэ шанга бэеэрээ, богони аад, бүдүүн хүзүүгээрээ, богони хүлнүүдээрээ, өөдөө бодоһон богони дэлһээрээ болон һамбайгүйгөөрөө илгардаг. Эрдэмтэдэй шэнжэлжэ элирүүлһээр, эдэ морин элжэгэн хоёрой бүхы һайнииень шэлэжэ абаһан ха. Тэдэ шагнаха үнэрдэхэдөө бэрхэ тула хаана холоһоо дайсадаа мэдэдэг.
Гайхалтайнь гэхэдэ, Пржевальскиин морин 66 хромосомтой, харин монгол морид – 64. Эдэ һонин амитад ХХ зуун жэлэй 60-аад онуудаар үндэһөөрөө үгы болон алдаа. Хүн зон гээшэмнай – үнэхөөр байгаалиин дайсад гэхээр. Туруута амитадые абалан агнахада амар гэхэдэ, бэлшээриинь газарые малшад эзэлээ ха юм. Тиигэжэ Улаан номдо оруулагдажа, гансал онсо харууһатай дархан газарнуудта энэ адуун үлөө. Эгээл олон толгойнь Монголой Хустайн Нуруу заповеднигтэ амидарна. Тэндэл эдэ һонирхолтой амитадай гэрэл зурагуудые буулгааб. Һонин гэхэдэ, Чернобыльско АЭС-эй хорлогдоһон газарта табиһаниинь, эдэ морид ядамаггүй амидаржа, үшөө унагална.
Анхан сагһаа тала дайдаар өөрын дураар ябаһан эдэ моридые хэншье һургажа шададаггүй.
Александр ГАРМАЕВАЙ гэрэл зурагууд