Ахын һарлаг - нютагай баялиг.burniish.ru
Байгаали хамгаалга ба хүдөө ажахы – үндэһэ һууринь, үйлэдбэриин болон хангамжын һалбаринууд – онсо удхатайнь, арад зоной үдэхэ, бодохонь болон ниигэмэй һалбари – гол шухалань. Иимэ гурбан шэглэл Аха аймагай тогтууритай хүгжэлтэдэ шэлжэн орохо дүримүүд боложо, нютагай засагай байгууламжын 2035 он болотор хараалһан Гол бодол дотор элирхэйлэгдэнхэй.
Хоорондоо холбоотой
Эдэ гурбан шэглэл хадаа өөһэд хоорондоо нягта холбоотой байхаһаа гадна, бэе бэеһээ дулдыдана, бэе бэедээ нэмэлтэ болоно. Эгээл тиимэһээ хүгжэлтын шалтагааншье, ахижа үйлэдбэрилхэ ушар нүхэсэлшье, мүн баһа сэгнэлтын үзүүлэлтэ болоно гээшэ. Энээн тухай аймагай холын хараатай Гол бодол зохёогшод онсолон тэмдэглэнэ.
Буряад Уласаймнай аймагууд болон бусад байгууламжанууд саашанхи хүгжэлтынгөө хараа бодол элирхэйлжэ, нютагай засагай зургаануудай, үйлэдбэриин, хангамжын һалбаринуудай болон ниигэмэй эмхи зургаануудай, бүхы ажаһуугшадай хамта шиидхэхэ олон тоото зорилгонуудые табина гээд мэдэнэбди. Зүүн Саяанай арьяа барья хадануудай хабшал соо оршодог холын һайхан нютагайхидшье 2035 он болотор болзорто хүгжэхэ, дабшаха замайнгаа хараа бодолнуудые тодорхойлон түсэблөө.
Малаа олон болгохо түсэбтэй
Малайнгаа тоо 2019-2024 онуудта 25 мянган толгойдо ахаархин хүргэхэ һанаатай. Саашанхи табан жэлэй туршада – үшөө гурбан мянган толгой нэмэхэ. Харин 2035 он болотор ажаһуугшадаа 32 мянган толгой малтай болгохоор аймагай захиргаан түсэблэнэ.
Энэ һалбарида үйлэдбэри хэрэгтэй болоно. Тиигээгүй һаа, малай тоо олон болгоһоной ямар хэрэг байхаб? Хүдөө ажахын, илангаяа мяха буйлуулдаг үйлэдбэринүүдые байгуулжа, хүгжөөхэ түсэб тухайгаа Аха аймагай засаг дарга Матвей Мадасов Буряад Уласай Засагай газарай үнгэрһэн һарын зүблөөн дээрэ хөөрэһэн байха юм.
Хэр угһаа хойшо мал үсхэбэрилдэг ажахынуудаараа ахаархин холо ойгуур суурхадаг. Тэндэхи малай мяханай шанарынь һайн. Үндэр хада уулаар ургадаг шэмэ шүүһэ ехэтэй, хоморой үнэтэ ургамалаар эдеэлдэг мал адууһанай мяханиинь амтатай байгаагүйдөө аргагүй.
Алдар сууда гараһан Ахын һарлагай мяхан мүнөө бага-багаар консервэ болгогдожо эхилэнхэй. Хамаг дэлгүүрнүүдтэ худалдагдадаг болоторнь үдыхэн юм ааб даа, гэбэшье ажал эхилээ. Ерээдүйн сагта тиимэ жэжэ хэдэн гү, али нэгэ томо үйлэдбэриин бии болоо һаа, хадата нютагай юрын малшад хашараг, буруугаа хашалгүйгөөр тушаажа, хашарһан зэд, һаршаганаха саарһан мүнгэеэшье үбэр- тэлхэ дуратай байха.
Хүдөө ажахын һалбари хүгжөөхэ талаар хэдэн түсэл бэелүүлхээр Ахын захиргаан бэлдэнэ. Һү үйлэдбэрилгын багахан цех барюулжа, биһалаг, тоһо, зөөхэй, ааруул гэхэ мэтэ амтан эдеэ хэхэ. Мүн тиихэдэ тэжээл бэлдэхэ эмхи байгуулха һанаатай. Мал үүсэлхэ цех, үүлтэртэ бухануудай үрэһөөр үнеэдые тугаллуулха, мүн тиихэдэ һарлаг үсхэбэрилдэг ажахы байгуулха, Холын хойто зүгэй үндэһэн арадуудай тоодо оролсодог һоёдуудай ажахын заншалта гол һалбари – оро үсхэбэрилгэ хүгжөөхэ түсэбүүд бии.
Уһанай экономико угаа олзотой гү?
Шэнэ һалбари – уһанай экономико байгуулжа, мүльһэнэй болон булагай уһанһаа өөрэгүй һайн шанартай уһа юулэжэ худалдахые дэмжэхэ, байгаалиин гүнһөө бурьялан гаража байгаа эм домто аршаануудай уһа мүн лэ юулэжэ, худалдаанда табиха түсэб Аха аймагай захиргаан бэелүүлхэ һанаатай.
Уһанай экономико байгуулхын түлөө аршаан булагаар баян, үзэсхэлэн һайхан Хойто-Гол гэжэ газарта эм- нэлгэ - элүүржүүлгын согсолбори (комплекс) барюулха, бүхы аршаануудаа шэнжэлүүлхэ һайн түсэбүүд байна. Гэхэтэй хамта, эм домто уһа худалдаанда гаргаха һаналай бэелүүлгэ ямар байхаб гэжэ бодолгото болохоор. Шанар һайтай, сэбэр уһан манай сагта хаанашье хэрэгтэй. Ябаһан газартаа ямаршье зон, нэн түрүүн аяншалагшад, шэл амһарта юулэгдэһэн уһа бэдэрдэг ха юм. Энээгээр бодохо болоо һаа, ахаархинай түсэб һайн. Теэд оршон тойронхи байгаалида энэ түсэл ямар нүлөө үзүүлхэ шадалтайб? Бүхы талаһаа шэнжэлжэ, шүүмжэлжэ, ори ганса оносотой шиидхэбэри олохоор ха.